Авионскиот сообраќај важи за еден од најбезбедните начини на патување, но несреќи, иако многу ретки, сепак се случуваат. Затоа, многу патници се прашуваат дали изборот на седиште може да влијае на шансите за преживување во случај на несреќа.

Некои ги избираат седиштата над крилата, бидејќи тој дел се смета за конструкциски најцврст дел од авионот, додека други предност му даваат на задниот дел од леталото, верувајќи дека е подалеку од местото на најсилниот удар. Сепак, експертите нагласуваат дека одговорот не е толку едноставен.

Секоја авионска несреќа има различно сценарио

Хелен Мјур, поранешна директорка на Институтот за безбедност, ризик и доверливост при Универзитетот Кранфилд, објаснува дека не постојат две идентични авионски несреќи. Авионот може да удри со носот, опашката, крилото или централниот дел од трупот, а токму од тоа зависи кои делови од леталото ќе бидат најзагрозени.

На пример, ако авионот прво удри со предниот дел, патниците што седат назад може да имаат одредена предност. Но, доколку пожар избувне во задниот дел на авионот, ситуацијата е сосема поинаква. Затоа е речиси невозможно однапред да се одреди кое седиште е апсолутно најбезбедно.

Најважно е колку сте блиску до излезот

Според експертите, многу поважен фактор од тоа дали седите напред, во средината или назад е оддалеченоста од излезите за итни случаи.

- Во авионот не постои едно најбезбедно место, бидејќи би требало однапред да знаете како ќе дојде до несреќата - вели Мјур и додава дека лично избира седишта од кои има пристап до поголем број излези, но нагласува дека современите авиони се проектирани така што на патниците им нудат приближно еднакви шанси за преживување.

Во случај на евакуација, најважно е да се следат упатствата на екипажот и што е можно побрзо да се стигне до најблискиот достапен излез.

На крајот, експертите низ шега често се согласуваат во едно - најбезбедното место за време на авионска несреќа е она што се наоѓа надвор од авионот, односно на аеродром.

Извор: BIZlife.rs
Фото: Unsplash