Вежбањето околу 10 часа неделно би можело да обезбеди значително посилна заштита од срцеви болести отколку сегашниот минимум што го препорачува Светската здравствена организација (СЗО), покажува новото истражување чии резултати ги пренесува агенцијата ДПА.
Истражувачите од кинескиот Универзитет „Макао политехник“ известија дека возрасните што неделно практикуваат од 560 до 610 минути (околу 10 часа) умерена до интензивна физичка активност можат да го намалат ризикот од кардиоваскуларни болести – вклучувајќи срцев удар, мозочен удар и срцева слабост – за повеќе од 30 отсто.
Резултатите се објавени во британското списание „Бритиш џурнал оф спортс медисин“.
Истражување со помош на акцелерометри
Истражувањето ја дефинира умерената активност како вежбање кое ја забрзува работата на срцето и дишењето, но сепак овозможува разговор, додека интензивната активност вклучува тешко дишење и отежнато зборување.
Притоа, истражувачите ги анализирале податоците на 17.088 лица од британската здравствена база на податоци „УК Биобанк“.
Учесниците една недела носеле акцелерометри за објективно мерење на нивото на физичка активност и поминале тестирање на кондицијата, вклучувајќи проценето мерење на потрошувачката на кислород на ергометар. Биле следени осум години за да се соберат податоци за развојот на кардиоваскуларни болести.
Успех кај едвај 12 отсто од учесниците
Анализата покажа дека исполнувањето на препораките на СЗО од најмалку 150 минути неделна активност го намалува ризикот од кардиоваскуларни болести за 8 до 9 отсто.
Сепак, учесниците што вежбале приближно 10 часа неделно забележале значително поголемо намалување на ризикот од повеќе од 30 отсто.
Само околу 12 отсто од учесниците успеале да го постигнат ова ниво на физичка активност.
Фото: magnific