Додека сите други лиги мируваат, а играчите се одмораат, во Премиер лигата за време на Божиќ и Нова година се игра со полна пареа. Сè почнува денеска, со традиционалниот Боксинг деј.

Играњето фудбалски натпревари на 26 декември датира далеку во минатото и влече корени од почетокот на фудбалот каков што го знаеме денес. Шефилд ФК и Халам ФК во Штефанџ во 1860 година, на Свети Стјепан, ден по Божиќ (католички) го одиграа првиот натпревар меѓу два фудбалски клуба во историјата. Потоа, во првиот дел од сезоната на старата Фудбалска лига (1888./1889) Престон на 26 декември го победи Дерби со 5:0 и така овој датум засекогаш почна да се користи во термините на англиските натпревари.

Постојат многу теории по кои Боксинг деј го добил името, но најприфатена е онаа за господарите и слугите. „Christmas Box“ (Божиќна кутија) е англиски назив за подарок за Божиќ. Богатите Англичани, кои имале свои слуги и помошници во нивните домови, на 26 декември им давале „божиќни кутии“, што се нарекувало „Boxing Day“ и потоа им дозволувале да заминат во своите куќи, да бидат со нивните семејства.
Друга теорија е дека на Божиќ во црквите во кутии се собирале пари, кои еден ден подоцна (Boxing Day) се отворале, а некои тврдат дека бродовите на прекуокеанските патувања товареле кутија со пари за среќа, која му ја давале на свештеникот при доаѓањето во пристаништето, а тој парите им ги делел на сиромашните еден ден по Божиќ.

Како и да е, повеќе од 120 години на 26 декември во Обединетото Кралство се игра фудбал. Премиер лигата, пониските лиги, аматерските лиги – сите играат. Натпреварите се распоредени така што навивачите што помалку да патуваат, и најчесто не се играат големи дерби-мечеви, за да се избегнат нереди за време на Божиќ.

Сепак, најмногу се памети Боксинг деј од 1963 година, кога на десет натпревари во Дивизија еден „паднале“ неверојатни 66 гола.

Денес, англиските тренери и играчи се жалат на пренатрупаност и недостиг на време за одмор.