Лошата кондиција и недостигот на физичка активност не влијаат само врз телото, туку и врз нашата психа. Дисциплината потребна за постигнување кондиција го тренира умот и придонесува за емоционална отпорност, заклучија научниците. Редовното вежбање е важно и за внатрешниот мир.

Што е кардиореспираторна кондиција?

Истражување објавено во списанието „Акта психологика“ откри дека поголемата кардиореспираторна кондиција (CRF) има врска со пониско ниво на анксиозност и бес, како и со поголема емоционална отпорност. Кардиореспираторната кондиција е способност на срцето, белите дробови и крвните садови ефикасно да испорачуваат кислород до мускулите при долготрајна физичка активност – тоа е мерка за тоа колку е ефикасен „внатрешниот мотор“ на личноста и колку долго може да издржи напор - трчање, пливање, брзо одење - пред да се умори.

Истражувачите од бразилскиот Федерален универзитет во Гојас поделија 40 здрави млади учесници во две групи: оние со натпросечно (АА) и оние со потпросечно (БА) ниво на кондиција. Двете групи одделно набљудуваа или група неутрални слики (како секојдневни предмети) или група непријатни слики (вклучувајќи сцени на повреди и застрашувачки ситуации) дизајнирани да предизвикаат стрес и негативни емоции.

Лошата кондиција носи дури 775 отсто поголем ризик од зголемување на анксиозноста

Сите учесници се чувствуваа понапнато по гледањето на вознемирувачките слики, но оние во групата АА останаа значително посмирени од оние во групата БА. Кај учесниците со полоша кондиција забележан е дури 775 отсто поголем ризик дека нивото на анксиозност ќе им скокне од умерено на високо. Наодите покажуваат дека лицата со повисока CRF се склони кон пониска анксиозност и поголема отпорност кога се изложени на емоционално стресни ситуации. Научниот тим истакна дека ова дополнително ги поткрепува доказите за тоа дека физичката активност игра клучна улога во емоционалното здравје. Како што наведуваат, лицата што се занимаваат со физички активности (особено аеробни вежби) се поотпорни во стресни ситуации и имаат пониско ниво на анксиозност.

Групата БА покажа посилно чувство на бес и послаба контрола над него во споредба со групата АА. Всушност, колку што личноста била во послаба форма, толку била поголема веројатноста дека ќе реагира врз основа на својот бес кога ќе се соочи со стресни ситуации.