Историјата е величествена, иднината инспиративна: Многу може да се каже за двете. Но, една идеја доминира со мојот ум. Ова – мои најмили- е за вашата благородна цел.
Вршев опсервација на електрични празнења, кои изгледаа необјасниво. Колку и да беа неизвесни, ме убедија дека не е далеку времето кога сите луѓе на оваа планета ќе ги впериме своите очи кон небото, чувствувајќи љубов и почит, одушевени од веста: „Браќа! Имаме порака од друга планета, непозната и далечна. Пораката гласи: еден... два... три...“

Писмото е испратено на Божиќ (според православниот календар) - 7 јануари 1900 година.
„...Дури и сега, одвреме-навреме, магловитo се сеќавам на инцидентот, и го гледам апаратот како да е пред мене. Моите први опсервации позитивно ме исплашија, бидејќи во нив имаше нешто мистериозно, да не речам натприродно, а јас бев сам во мојата лaбораторија ноќе... Промените што ги забележав беа периодични, со прецизни повторувања кои сугерираа дека станува збор за број и ред на кои не можеше да им се најде изворот од ниедна позната причина. Бев запознаен, се разбира, со слични електромагнетни зрачења што потекнуваат од Сонцето, аурора бореалис и Земјините струи и бев сигурен (колку што може да им се верува на фактите) дека овие варијации не беа предизвикани од истите... Помина некое време кога ми светна во умот дека сигналите што ги сведочев можеби се резултат на интелигентен извор. Иако не можев целосно да го дешифрирам нивното значење, беше невозможно да се мисли дека се сосема случајни. Чувството дека јас бев првиот човек што слушна поздрав од една планета до друга постојано расте во мене. Имаше цел во овие електрични сигнали; и со тоа убедување им одговорив на Црвениот крст кога ме прашаа да идентификувам едно од најголемите можни откритија во следните сто години: дека можеби тоа ќе биде јавното признание и објава на меѓупланетарната комуникација која како предизвик стои пред нас. Враќајќи се во Њуjорк, ме пречека итна работа која го преокупира целото мое внимание, но никогаш не престанав да мислам на тие искуства од опсервациите во Колорадо. Цело време се трудам да ги унапредам моите апарати и веднаш штом ќе можам, ќе продолжам со своите истражувања таму каде што застанав, бидејќи бев принуден да одложам...
Апсолутна потврда на приемот и размена на пораки ќе биде постигната кога ќе одговориме со бојот „четири“, како одговор на сигналот „еден, два ,три“.


*Професор Краус во 1956 година ќе ги открие електромагнетните зрачења кои во последователен ред доаѓаат од Јупитер и зависат од аголната позиција на неговиот природен сателит Ио.
**Околу 100 години подоцна, во 1996 година Кенет Л. Корум и Џејмс Ф. Корум ќе објават текст (од 81 страница) во кој ќе ги објаснат „сигналите од Марс“ на Тесла како електромагнетни зрачења од Јупитер и аголната позиција на Ио.

П.С. Целта на оваа колумна не е да претстави научно точни податоци кои можете да ги најдете во стручна литература, туку да го претстави човечкиот лик на нашиот омилен научник.