Eдинственото нешто полошо од боцкањето со игла е повторното боцкање откако првиот обид бил неуспешен.  Истражувачите од Универзитетот „Рутгерс“ и болницата „Маунт Синаи“ развиле робот што може да види под вашата кожа и наводно да ја заврши работата подобро од луѓето. Тоа би можело да помогне за намалување на проблемите како инфекции и тромбоза при обид за ставање инфузија.

Релативно е лесно да се земе крв од пациент со вени со лесен пристап, но е потешко кај пациенти без видливи или опипливи вени, особено кај исцрпен пациент. Во овие случаи персоналот ќе мора да користи ултразвучна машина за појасно да ги види вените.

Роботот за земање крв само прескокнува директно на тој чекор, користејќи вградена технологија за ултразвук за да го води поставувањето на иглата. Целиот систем вклучува модул за ракување со примероци и анализатор на крв базиран на центрифуга.

Со лесно пристапни вени, машината може успешно да земе крв во 97 отсто од времето, со вкупна стапка на успех од 87 отсто кај 31 учесник. Според извештајот, лекарите не успеале помеѓу 27 и 60 отсто од времето кај пациенти со тешко пристапни вени, во зависност од природата на проблемот. Сепак, машината имала пониска стапка на успех отколку медицинскиот персонал за луѓе со тешко пристапни вени, особено кај исцрпените пациенти.

Но, роботот сè уште е прототип и истражувачите потенцијално би можеле да ја подобрат неговата стапка на успех. Еден ден би можел да се користи во амбулантите и во ургентните одделенија за процедури како периферно ставен централен катетер, дијализа и слично.

- Уредот би можел да им помогне на лекарите брзо да добијат примероци, безбедно и сигурно, спречувајќи непотребни компликации и болка кај пациентите - вели Џон Липхајмер, главен автор на истражувањето.

Извор: www.engadget.com
Фото: Unnati Chauhan