При плаќање со картичка најчесто внесуваме ПИН-код. Но, истражувачки тим од Универзитетот во Британска Колумбија работи на алтернатива - наместо броеви, терминалите би можеле да препознаваат потег на раката.

Принципот е едноставен: при секоја трансакција картичката и терминалот веќе разменуваат радиосигнали. Истражувачите ги искористиле токму тие сигнали и додале мали калеми на уредот. Тоа создало ситни промени во магнетното поле, што овозможуваат препознавање дали картичката е поместена налево или е накратко допрена. Компјутерска програма ги поврзува овие промени со соодветните потези и така може да препознае дури девет различни движења, меѓу кои бришење во четири насоки, двоен допир и кратко поместување. При тестирањата системот постигнал прецизност поголема од 90 отсто.

Најважниот аспект не е самиот потег, туку фактот дека корисникот не мора да го допира апаратот. Картичката се движи над антената, а уредот ги „чита“ сигналите и го препознава движењето. Така, за одобрување на трансакцијата е доволен само еден потег на раката.

Ова го намалува ризикот од ширење микроорганизми, а може и да им помогне на луѓето со моторички тешкотии или на постарите лица.

Дополнителна предност е безбедноста. Додека ПИН-кодот може лесно да се дознае, личниот потег е тешко да се имитира. Дури и при загуба на картичката, мала е веројатноста некој друг да го знае гестовниот код.

- Интеракцијата преку потези може да понуди и дополнително ниво на безбедност - вели доктордандот Бу Ли.

Системот во моментот препознава девет геста со прецизност од околу 92 отсто, иако некои потези како движење нагоре или слободен вертикален потег се потешки за препознавање. Но, тоа може да се подобри со промена на положбата на терминалот или со мали визуелни ознаки.

Инсталацијата на технологијата би чинела најмногу 20 долари по уред. Многу од постојните терминали веќе имаат доволно капацитет за оваа надградба, а во други случаи е потребно само евтино дополнување.

- Голем дел од уредите веќе се подготвени за оваа технологија - вели раководителот на проектот, Роберт Сјао.

Извор: Nova.rs
Фото: Freepik