Дали вашиот карактер може да влијае врз вашите навики во исхраната и изборот на здрав начин на живот? Ова се главните прашања во студијата спроведена од Јоанис Царцапакис и Аглаја Зафеируди од Универзитетот „Аристотел“ во Солун и Универзитетот во Тесалија, Грција.

Поконкретно, истражувачите биле заинтересирани за тоа како големите пет особини на личноста, широко прифатен модел за кој се верува дека ги опфаќа основните димензии на личноста, влијаеле врз консумацијата на храна и здравите навики за исхрана. Петте особини се: отвореност, совесност, екстровертност, согласност и невротичност.

За да го истражи влијанието на „големата петорка“ врз исхраната, истражувачкиот тим извршил преглед на литература на студии кои се фокусирале на улогата на овие фактори на личноста во навиките и преференциите во исхраната.

Резултатите биле впечатливи. Царцапакис и Зафеируди откриле дека секоја од големите пет особини е поврзана со преференции и навики во исхраната. Нивните наоди се сумирани подолу:

- Совесноста вклучува самоконтрола, поставување цели, планирање однапред и држење до правила. Луѓето со висока совесност имаат поголема веројатност да направат поздрав избор на храна, да одржуваат здрава телесна тежина преку добри навики во исхраната и да се држат до целокупното здраво однесување.
-Отвореноста кон искуството се однесува на љубопитност, креативност и отворен ум. Луѓето со висока отвореност уживаат во нови искуства, ја ценат уметноста и се во допир со нивните чувства. Спротивно на тоа, луѓето со слаба отвореност претпочитаат воспоставени рутини и верувања - и може да се сметаат за конвенционални. Луѓето со висока отвореност покажуваат поздрави навики, како што се јадење повеќе овошје и зеленчук и следење балансирана исхрана, особено додека стареат. Отворените поединци, исто така, имале помала веројатност да страдаат од „неофобија со храна“ или од избегнување или страв од јадење нова храна.
-Согласноста доловува како една личност комуницира со другите. Поединците со ваквиот карактер се отворени за другите, алтруисти се, доверливи и сочувствителни. Можеби не е изненадувачки, но оваа особина била поврзана со малата потрошувачка на месо.
-Екстровертноста се однесува на тоа како луѓето комуницираат со другите и колку уживаат во дружењето. Исто така, се однесува на тоа колку некој се чувствува позитивно, енергично и живо во различни општествени контексти. Луѓето со ваков карактер се типично социјални, зборливи и енергични. Тие напредуваат во социјални услови, бараат забава и се оптимисти. Покрај тоа, тие уживаат во авантуристички активности, вклучително и опасни спортови. Екстровертноста била поврзана со консумирањето слатка и солена храна, месо и сокови. Луѓето со висока екстровертност често прават избор на нездрава храна, велат истражувачите, бидејќи веруваат дека се во добро здравје - и имаат поголема веројатност да се вклучат во ризично однесување.
-Невротичноста зборува за тоа како личноста се справува со емоциите и колку стабилно се чувствува. Луѓето со висока невротичност може да искусат повеќе негативни емоции, емоционална нестабилност, хипохондрија и стрес. Тие, исто така, може да се борат со чувствата на несоодветност, нервоза и анксиозност. Луѓето со ваков карактер покажале нездрави навики во исхраната, вклучувајќи помал внес на овошје и зеленчук и висока потрошувачка на шеќер и заситени масти.

Пред речиси 200 години Жан Антелм Брилат-Саварин во својата книга „Физиологија на вкусот“ напишал: „Кажи ми што јадеш и јас ќе ти кажам кој си“. Наодите од оваа современа студија сугерираат дека тој бил во право.

Извор: psychologytoday.com

Фото: Freepik