Земјите низ светот претпазливо ги отвораат своите граници и составуваат низа правила и ограничувања што треба да ги следат сите посетители. Секако, тоа го прават и земјите од регионот и земјите што им се омилени дестинации на Македонците за летување. Со цел да ви помогнеме подобро да се подготвите за претстојните одмори, изготвивме мала компилација за документите што ви се потребни доколку сакате да одите на одмор во Грција, Бугарија, Албанија или друга земја од регионот, како и за земјата низ која често се транзитира - Косово.
Грција
Сите патници мора да имаат формулар ПЛФ, кој може да се најде на веб-страницата
travel.gov.gr, пополнет најмалку 24 часа пред датумот на влез. Освен тоа, сите патници мора да имаат сертификат за вакцинација издаден од јавна установа и да имаат доказ дека се поминати најмалку 14 дена од денот на нивната вакцинација против ковид-19.
Алтернативно, патниците може да влезат со негативен резултат од ПЦР-тест, не постар од 72 часа, издаден од сертифицирани јавни или приватни лаборатории. Патниците може да влезат и со потврда за прележан ковид-19 или позитивна дијагноза со методот ПЦР или антиген со важност од два до девет месеци од назначениот датум на болеста.
Ова не се однесува на
деца помали од 5 години. Згора на тоа, сите патници што влегуваат во Грција ќе бидат подложени на брз тест за ковид-19 на граничниот премин.
Бугарија
Граѓаните на Македонија може да влезат во Бугарија со документ за вакцинација со 2 дози вакцини, со 14 дена поминати од последната примена вакцина. Алтернативно, патниците може да влезат со негативен резултат од ПЦР-тест, направен 72 часа пред влегувањето или со документ за негативен резултат од брз антигенски тест, направен 48 часа пред влегувањето.
Исклучок се:
- транспортни работници и членови на екипажи за железнички, патен, авио и морски сообраќај;
- погранични работници;
- лица што патуваат транзитно;
- ученици и студенти што живеат во Македонија и патуваат најмалку еднаш неделно во Бугарија или, пак, ученици и студенти кои живеат во Бугарија и патуваат најмалку еднаш неделно во Македонија;
- деца до 5-годишна возраст.
Доколку патниците немаат ниту еден од наведените документи или не ги исполнуваат условите, задолжителен е 10-дневен карантин, кој може да се укине доколку во рок од 24 часа од пристигнувањето се покаже негативен ПЦР-тест.
Хрватска
Влезот во Хрватска за граѓаните на Македонија се одобрува за нужни и туристички потреби. За влез подолг од 12 часа во Хрватска, потребно е да поседувате негативен ПЦР-тест или брз антигенски тест за ковид-19, кој е наведен на заедничка листа на брзи антигенски тестови кои меѓусебно ги признаваат државите-членки на ЕУ, ако резултатот не е постар од 48 часа од моментот на тестирање до доаѓањето на граничниот премин.
Доколку се работи за брз антигенски тест, во тој случај дозволен е престој во Хрватска 10 дена, каде што по 10. ден потребно е повторно да се направи тестирање.
Алтернативно, патниците може да влезат со потврда за целосна вакцинација пред повеќе од 14 дена. Доколку патниците немаат ниту еден од наведените документи или не ги исполнуваат условите, задолжителен е 10-дневен карантин.
Деца помали од 7 години што патуваат во придружба на родители/старатели се изземени од обврската за прикажување негативен резултат и самоизолација ако родителите/старателите поседуваат негативен ПЦР или брз антигенски тест, односно потврда за вакцинација или прележан ковид-19.
На посетителите што патуваат од повеќето земји им е потребен негативен ПЦР-тест од регистрирана лабораторија, направен во рок од 72 часа по патувањето за да влезат во Црна Гора или позитивен тест на IgG антитела издаден од регистрирана лабораторија, не постар од 30 дена. За деца на возраст под 5 години не е потребен тест.
Државјаните и жителите на Црна Гора без негативен ковид-резултат издаден најмногу 72 часа пред поаѓање, подлежат на самоизолација во времетраење од 14 дена.
Ова не се однесува на:
-
Деца помали од 5 години;
- Патници што пристигнале од или кои биле во Албанија, Белорусија, Босна и Херцеговина, Хрватска, Косово, Македонија, Русија, Србија или Украина во изминатите 15 дена;
- Патници што имаат негативен антигенски тест за ковид-19 направен најмногу 48 часа пред пристигнувањето.
- Патници што имаат позитивен тест за антитела издаден најмногу 30 дена пред пристигнувањето.
- Патници со позитивен резултат од ковид-тест издаден најмалку 14 дена и најмногу 90 дена пред пристигнувањето и потврда за закрепнување во која се наведува дека патникот не е заразен;
- Патници со сертификат за вакцинација ако патникот ја примил последната доза на вакцина најмалку 14 дена пред пристигнување.
Косово
За влез во Косово е потребна потврда од негативен ПЦР-тест направен не повеќе од 72 часа пред влегувањето за лицата кои доаѓаат од високоризичните земји според Европскиот центар за превенција и контрола на болести (ECDC). Исклучок се патниците што поминуваат низ земјата и ја напуштаат за најмногу 3 часа по влезот. Исклучок се и превозниците, дипломатите и лицата со потврда за вакцинација против ковид-19.
Патниците може да влезат и со позитивен антигенски тест направен пред најмногу 30 дена.
Албанија
Албанија вчера извести дека на први јуни ги отвори границите и дека за сите што сакаат да ја посетат земјата, нема никакви ограничувања за влез, без разлика дали станува за тест или посебен документ.
За патниците што сакаат да влезат во Албанија по копнен пат, нема 14-дневен карантин, освен во посебни случаи со наредба на здравствените власти.
На граничните премини не се бараат посебни документи за влез на албанска територија.
Од албанското МНР известија и дека од 1 јуни во Албанија има полициски час од 23 до 6 часот, задолжително е носење маска во затворени простории, јавен превоз, а се препорачува маска да се носи секаде каде што не може да се одржи дистанца, како и за оние што не примиле две дози на вакцина и кои се сметаат за ризични. Ноќните клубови и дискотеките остануваат затворени, а музика може да се пушта до 22 часот. Баровите и рестораните се затворени за време на полицискиот час, со исклучок на оние што вршат достава.
Од 15 јуни на отворен простор ќе може да се групираат 50, наместо како досега 10 лица, но со почитување на правилата за дистанца.
Од 1 јули полицискиот час ќе трае од полноќ до 6 часот изутрина, но музика повторно ќе може да се пушта до 22 часот.
Од патниците што доаѓаат од Авганистан, Бангладеш, Бразил, Јужна Африка, Индија, Непал, Пакистан, Шри Ланка и оние што биле во овие земји во последните 14 дена, ќе биде побарано да достават негативен ПЦР-тест не постар од 72 часа пред влегувањето во Турција. Овие патници ќе бидат во карантин. Истото важи и за патници од Велика Британија, Иран, Египет и Сингапур.
Оние патници што потекнуваат од земји кои не се вклучени погоре, нема потреба да доставуваат негативен ПЦР-тест доколку достават документ издаден од официјалните власти на соодветната земја во кој се наведува дека биле вакцинирани најмалку 14 дена пред влегувањето во Турција или ја прележале болеста и се излекувани во последните 6 месеци. Карантинските мерки нема да се применуваат за овие патници.
Доколку патниците од овие земји немаат потврда за вакцина или документ што покажува дека ја прележале болеста, треба да имаат негативен ПЦР-тест не постар од 72 часа пред влегување во Турција или негативен брз антигенски тест максимум 48 часа пред влегувањето во Турција.
Малта
Малта воведе нови правила за влез во земјата. Накратко, влегување во земјата е дозволено само доколку патниците прикажат сертификат за примена вакцина или негативен ПЦР-тест. Во моментов прифатен е само малтешкиот сертификат за вакцини иако билатералните договори со други земји треба да се објават во наредните денови.
Ако, од некоја непозната причина, на некое лице му се дозволи да се качи во авион без потребните документи, здравствените власти ќе спроведат ПЦР-тестирање по пристигнувањето во земјата. Но, за разлика од последните месеци кога им беше понудено на патниците бесплатно, сега овој тест ќе мора да се плати 120 евра. Исто така, доколку се позитивни, ќе мора да си го платат 14-дневниот карантин, кој изнесува 100 евра од вечер.
Освен пасошот, сертификатот за вакцина или негативен ПЦР-тест не постар од 72 часа, патниците ќе мора да достават и образец за лоцирање патници кој обично се користи за контактирање доколку се открие позитивен случај во авионот.
Овие правила не важат за деца под 5 години.
Кипар
Кипар воведе категоризација на земјите од Европскиот центар за болести и контрола, што ги класифицира земјите во зелена, портокалова или црвена категорија. Додадена е и сива категорија која предвидува добивање специјална дозвола за патување на Кипар. Министерството за здравство на неделно ниво ќе ја објавува категоризацијата на земјите.
Земји што припаѓаат во зелената категорија - За граѓаните од овие земји нема да биде потребен молекуларен тест.
Земји: Малта, Исланд, Австралија, Нов Зеланд, Сингапур, Саудиска Арабија, Јужна Кореја, Израел.
Земји што припаѓаат во портокаловата категорија - Во оваа категорија, сите патници што пристигнуваат од земјите подолу мора да прикажат негативен ПЦР-тест не постар од 72 часа. Треба да се напомене дека кипарските државјани, легалните жители на Републиката и лицата со право да влезат во Републиката според Виенската конвенција, можат да изберат да се тестираат по пристигнувањето во Кипар (трошоците ќе ги сносат самите). Во овој случај, тие треба да останат во самоизолација, сè додека не се издаде резултатот од тестот.
Земји: Португалија, Ирска, Финска, Романија, Австрија, Бугарија, Чешка, Унгарија, Италија, Полска, Норвешка, Кина (вклучувајќи ги Хонгконг и Макао), Велика Британија, САД.
Земји што припаѓаат во црвена категорија - Во оваа категорија потребно е двојно лабораториско тестирање; негативен ПЦР-тест не постар од 72 часа пред поаѓањето и друг лабораториски ПЦР-тест што се прави по пристигнувањето во Кипар. Трошоците за овој тест ќе бидат на товар на патниците и тие треба да останат во самоизолација до издавањето на резултатот од тестот.
Земји: Белгија, Франција, Хрватска, Луксембург, Шпанија, Грција, Холандија, Данска, Словенија, Естонија, Летонија, Литванија, Шведска, Германија, Словачка, Андора, Монако, Ватикан, Сан Марино, Швајцарија, Лихтенштајн, Руанда, Русија, Обединети Арапски Емирати, Украина, Јордан, Либан, Египет, Белорусија, Катар, Србија, Тајланд, Ерменија, Грузија, Бахреин, Кувајт, Канада.
Сива категорија - Специјална дозвола. Земјите што не се наведени погоре се сметаат за сива категорија. За земјите од сива категорија, влез во Кипар е дозволен само за овие патници:
- Кипарски граѓани и членови на семејството;
- Европски граѓани, граѓани на земјите од Европската економска област (Исланд, Лихтенштајн, Норвешка) и на Швајцарија;
- Лица што легално престојуваат во Република Кипар
- Лица со право да влезат во Републиката според Виенската конвенција;
- Државјани на трети земји на кои им е дозволено да влезат во Република Кипар по специјална дозвола од Републиката.
Треба да се знае дека патниците што доаѓаат од земји од сива категорија треба да покажат ПЦР-тест не постар од 72 часа пред поаѓањето и да поседуваат сертификат што покажува негативен ПЦР-тест.
ПЦР-тест не е задолжителен за деца под 10 години.
Повеќето земји од Европската Унија сега се отворени за граѓаните, но земјите-членки сами поставуваат свои ограничувања и услови за странските посетители.
Европскиот центар за превенција и контрола на болести (ECDC) одржува мапа која во боја ги кодира областите во светот засновани на ризик. Таа се заснова на стапка на известување од 14 дена на 100.000 жители.
Областите на светот се категоризирани во зелена, портокалова, црвена, темноцрвена или сива боја. Темноцрвената е додадена неодамна за да се покаже највисок ризик.
Мапата им помага на земјите-членки на ЕУ да воспостават услови за влез, како што се тестирање и карантин за патници кои пристигнуваат од различни области на светот.
Барањето од поединци да имаат негативен ПЦР-тест пред да патуваат во Европа е ефикасен начин за спречување на ширењето на вирусот преку границите.
Задолжителното тестирање за патување во Европа е една од мерките поддржани од ЕУ.
Во согласност со овие упатства на ЕУ, сè поголем број од европските земји воспоставија тестирање за ковид-19 како услов за влез.
Патниците треба да ги проверат специфичните барања на земјата-членка на ЕУ што сакаат да ја посетат за да видат дали им треба тест и кои видови се прифатени.
Извор:
Blog.wego.com |
Tr.usembassy.gov |
Timesofmalta.com |
Cyprusflightpass.gov.cy |
Coronalab.eu |
Etiasvisa.com | mfa.gov.mk |
punetejashtme.gov.al |
mfa-ks.net
Фотографии: Pixabay