Во 1804 година светската популација достигна 1 милијарда. Во текот на следните 218 години празнините помеѓу достигнувањето на следната милијарда ќе стануваат сè пократки и пократки, додека во 2022 година ОН објавија дека има 8 милијарди луѓе на Земјата. Со оглед на тоа што бројот сè уште расте, каде сме сега?

Бројката за моменталната светска популација зависи од тоа каде гледате - да не зборуваме дека сигурно ќе се промени од времето на пишување и кога ќе ја прочитате оваа статија.

Според веб-страницата „Ворлдометер“, моментално има 8.179.550.700 луѓе. Тешко е да се потврди дали оваа бројка е точна затоа што би било прилично непрактично да се следат секое раѓање и секоја смрт во точниот момент кога ќе се случат.

Наместо тоа, како што објаснува Австралиската академија на науките, часовниците за светската популација ги користат сите достапни информации за да го одредат зголемувањето на населението во текот на следната година. Тоа може да вклучува податоци од попис, евиденција за раѓање и смрт и академски студии.

- Бидејќи растот на населението е континуиран, а часовникот што се ажурира еднаш на 12 месеци е малку досаден, тој го дели проценетиот годишен пораст со бројот на секунди во една година (31.536.000) - велат од Академијата.

Колкав ќе биде бројот на населението?

Без оглед на тоа кој е во право за моменталниот статус на светската популација, бројот на луѓе на планетата не се очекува да продолжи постојано да расте. Годинава најновото издание на ОН на Извештајот за изгледите на светската популација процени дека глобалното население ќе го достигне врвот од околу 10,3 милијарди во средината на 80-тите години на овој век, а потоа ќе падне на 10,2 милијарди до 2100 година.

Не само што тој врв и пад се предвидени многу порано од очекуваното, туку ако се случат, тоа ќе биде првпат по црната смрт во 14 век да опадне бројот на светското население.

На многу места веќе е забележан бавен раст, па дури и почна да опаѓа. Некои од попознатите примери се Италија и Јапонија, но според Централната разузнавачка агенција, која ги дава јавно достапни податоците за стапката на раст на населението, падот е најголем на островите Кук, каде што растот е на -2,24 отсто.

Многу фактори можат да влијаат врз растот на населението - не само раѓањата и смртните случаи, туку и миграцијата.

Како ќе изгледа светот кога популацијата конечно ќе почне да опаѓа? Времето ќе покаже, но научниците сигурно имаат идеи.

Извор: Iflscience.com
Фото: Freepik