Кога децата доаѓаат на училиште со предзнаење за буквите, фондот на букви што ги знаат е различен и се движи од неколку букви до речиси сите, но проблемот е што и покрај училишното правилно пишување, тие продолжуваат да ги пишуваат онака како што ги пишувале претходно. На часовите кога се изучуваат и пишуваат применуваат целосно или делумно правилно пишување, а потоа, кога треба да пишуваат зборови и реченици, повторно пишуваат онака како што ги научиле претходно. Тоа е очигледно преку направените дијагностички тестови што ги користиме на почетокот на учебната година каде што добиваме слика на предзнаењата за прво одделение и наученото од претходната година во погорните одделенија – вели одделенската наставничка Оливера Чаеска, која предава во ООУ „Мирче Ацев“ во прилепското село Лажани.