Седумнаесетгодишниот Стефан Јакимовски живее во светот на машините и електрониката. Подрумските простории во станбената зграда во штипската населба Сењак, каде што живее, ги претворил во работилница. Ова е светот на Стефан, за кого науката е водилка кон неговата иднина. ЦМЦ-машината, која самиот ја измислил, а потоа и ја направил склопувајќи ја дел по дел, ја претставил и на Меѓународниот саем за иновации „Инова Мак 2018“ во Скопје. Поддршка добил и од неговото училиште СОУ „Коле Нехтенин“-Штип, каде што веќе ја следи наставата во четврта година.

- Таму бев со мојот ментор Методи Симеонов и воедно бев најмлад учесник на саемот „Инова Мак 2018“. Можам да кажам дека на саемот се стекнав и со нови знаења и многу успеси. Ова ми е и мотив да продолжам да учествувам и на други саеми и на други натпревари - вели Јакимовски.

Машината служи за цртање и гравирање и од неа можат да се изработуваат разни украси, сувенири, без разлика дали се дрвени или пластични.


Направена е од евтини материјали, да не биде многу скапа, а деловите што се на неа се од македонско производство. Смета дека како машина може да се патентира, но таа постапка може да потрае и подолго време. Идеите за да направи нешто му доаѓаат спонтано, а најпрвин мисли дека се „глупави“, дека не можат да се користат. Но, подоцна, кога подобро ќе се разработат, сфаќа дека одредена иновација може да му користи некому.

Во неговата работилница има секаков алат, завртки, навртки и машини со кои ги работи своите иновации. Во просторот се чувствува колку ова младо момче е посветено на своите идеи и иновации.


Седумнаесетгодишниот иноватор Стефан работи и на втора иновација во делот на електрониката.

- Работам на Теслин трансформатор, на интегрирани кола, употребата на интегралните кола, домашна автоматика, безжични светла, за употреба на мобилните телефони, за контрола на домашни уреди и слично - објаснува Јакимовски.

Смета дека секој што знае некој занает и ѝ се посветува на науката има иднина. Ова младо момче, покрај тоа што учи,  стекнува и нови знаења преку практична работа во една приватна штипска работилница.


Ученик е во регионалното средно електро-машинско училиште „Коле Нехтенин“ и вели дека има одлични професори, а секој што има мал интерес од нив може многу да научи. Но, сè зависи од желбата и дали некој од учениците има визија со што ќе се занимава во иднина.

- Во училиштето има уште двајца или тројца ученици што вака работат. Образованието е голем придонес за еден млад човек. Тоа нè поткрепува, ни дава знаења, но секоја личност треба да има волја и желба за да успее. Условите за учење и практика во училиштето се задоволителни, може да бидат и подобри. Но, сепак, тоа се можностите кај нас, се надеваме дека ќе добиваме помош и од институциите - вели Јакимовски.


Неговиот професор Методи Симеонов вели дека првпат како училиште учествувале на Меѓународниот саем за иновации со ЦМЦ-машината на Стефан, а планираат да учествуваат и на Саемот за иновации „Макинова“ и да се пријават на државниот натпревар за труд.