Агенцијата за наоѓање туристички сместувања и изнајмувања „Ербиенби“ (Airbnb) објави дека воведува построга делумна забрана и контрола на употребата на камери за надзор во имотите што се изнајмуваат низ целиот свет.

Промената на практиката на компанијата стапува во сила на крајот од следниот месец, а целта е поедноставување на правилата за безбедност, како и да ѝ се даде приоритет на приватноста на гостите. Корисниците на „Ербиенби“ претходно многупати изразија загриженост за непристојна употреба на камери во становите и куќите што се изнајмуваат.

- Овие промени беа направени по консултации со нашите корисници, домаќините и стручњаците за приватност. Ќе продолжиме да бараме повратни информации за да се осигуриме дека нашите политики функционираат за нашата заедница низ светот. Со оглед на фактот дека повеќето огласи на „Ербиенби“ не споменуваат поседување камери за надзор, се очекува овие промени во политиката да придонесат и за помалку огласи на платформата - соопшти официјалниот претставник на агенцијата.

„Ербиенби“ во мигов дозволува користење камери за надзор во заедничките простории, како дневни соби и ходници, сѐ додека тие се наведени во огласот.

Новите правила забрануваат и надворешни камери насочени кон внатрешноста на зградите. Агенцијата за интернет-изнајмувања простор нема да дозволува камери во приватни простории, како што се спални соби и бањи. Сепак, новите правила дозволуваат камери кај влезовите, во ѕвончињата, како и уреди за следење звук во заедничките простории. Овие уреди ќе мора да бидат наведени во огласот.