Се чини дека продавниците на „Епл“ (вкупно 504 во целиот свет) ја изгубија примарната функција - продажбата. Сè повеќе потрошувачи, но и поранешни и сегашни вработени се жалат дека во нивните продавници добивањето совет за некој производ или, пак, купувањето станало речиси невозможна мисија. Грижата за изгледот и концептот на просторот, и силниот акцент на брендирањето изгледа станаа поважни и погласни од продажбата и грижата за задоволството на купувачите.

Дополнително, квалитетот на вработените опаѓа, а сè потешко е во продавниците да се дојде до технолошки експерти, кои би можеле да им помогнат на клиентите со брзите и поедноставните поправки или да им покажат како правилно да го користат уредот и слично.

Некогашниот „Genius Bar“ - простор кој беше наменет за техничка поддршка - сè почесто е заменет со концептот според кој неколкумина вработени шетаат по продавницата, а на купувачите им е се потешко да ги видат и да добијат совет.

Откако овој технолошки гигант во јануари ги зачуди инвеститорите на Вол стрит, објавувајќи дека приходите од продажбата во текот на божиќниот квартал ќе бидат значително под предвидувањата, првиот човек на „Епл“, Тим Кук, објави и дека на местото директор на малопродажба ќе дојде долгогодишната менаџерка во компанијата - Дирдри О'Брајан.

Наследничката на досегашната шефица на трговијата на мало, Анџела Арендс, ќе мора што поскоро да најде начин да ги приспособи продавниците на реалните потреби на купувачите. Тоа најверојатно ќе подразбира оттргнување од модерните и, како што се чини, нефункционални продавници и смислување простор во кој на клиентите ќе им биде јасно што можат да направат или да побараат некој да им помогне.

Првите продавници на „Епл“ се отворени во 2001 година во Лос Анџелес, а компанијата тогаш ги придоби клиентите со своите минималистички уредени простори, „бар“ за техничка поддршка и простор каде што луѓето можеа со часови да ги чепкаат најновите гаџети на „Епл“. Концептот тогаш функционираше феноменално, а набрзо таквиот пристап го применија и Мајкрософт, Самсунг, Тесла и други.

За фамозниот „бар“ за техничка поддршка, кој беше одлично прифатен меѓу клиентите, веќе немаше место. Продавницата требаше да личи на луксузен изложбен салон, а вистинската работа, како решавање проблем, требаше да се повлече во бекстејџот, кој е невидлив за потрошувачот. Арендс сè повеќе ја форсираше онлајн-продажбата, што не е нелогично, но непотребно им го комплицираше животот на оние што одеа во продавниците.

Според жалбите што ги опишуваат американските медиуми, станало речиси невозможно да се влезе во продавница и по 15 минути да се излезе со нов „ајфон“. Мора прво да се нарача преку интернет, па потоа да се подигне купениот уред од продавница. Многумина се жалат и дека техничката поддршка веќе не функционирала како што треба. „Genius Bar“ беше шанк на кој клиентот можеше да побара совет од експерт на „Епл“. Сега клиентите мора да одат до некој вработен, да го опишат проблемот, кој ќе биде внесен во „ајпад“, а потоа кога сервисерот ќе биде слободен, тој мора да го најде клиентот за да го земе уредот и да го однесе во просторијата одзади, каде што ќе работи на него. Таа услуга, како што се жалат клиентите и вработените, ги загубила човечноста и ефикасноста.

Како и да е, О'Брајан има тешка задача. Се предвидува дека таа би можела да ги подели продавниците во неколку делови специјализирани за дополнителни услуги на „Епл“. Некои вработени мислат и дека би можела да ги врати непрежалените шанкови. Останува да видиме што ќе се случува.