Високите температури и влагата може да ви влијаат доколку сте дијабетичар. Метаболизмот е побрз на топло и влажно време, што може да доведе до зголемени шанси за хипогликемија бидејќи може да се зголеми апсорпцијата на инсулин, пишува „Еклиника“.

Хипогликемијата е потешка за дијагностицирање на топлото време бидејќи потењето и уморот може да бидат симптоми на хипогликемија, а не само на топлината. Бидете особено внимателни доколку возите и проверете го шеќерот во крвта пред и по секое возење и правете редовни паузи за проверка доколку патувате подолг период.

Може да се спречи хипергликемија во летните месеци доколку почесто се проверува гликозата во крвта, особено доколку имате физички активности. Добро е при рака секогаш да имате јаглехидрати, како таблети со гликоза или слатки пијалаци.


Кои се симптомите за исцрпеност од топлина?

Луѓето со дијабетес имаат поголем ризик за исцрпеност во летните денови. Тоа може да се случи доколку многу се загреете и изгубите многу вода и сол од организмот. Симптоми за исцрпеност од топлина се почесто потење од обично, вртоглавица, грчеви во мускулите, главоболка, забрзана работа на срцето и мачнина.

Како влијае топлината врз дијабетесот?

Важно е да бидете свесни, без разлика каков тип дијабетес имате, дека вие ја чувствувате топлината посилно и на поинаков начин од оние без дијабетес. Високите температури влијаат врз нивото на гликоза во крвта, а во комбинација со умерена или голема физичка активност може да дојде до силно потење и дехидратација.

Една од компликациите кај дијабетесот е и оштетувањето на крвните садови и на нервите, па и потните жлезди, така што телото не може да се лади ефикасно како порано. Тоа може да доведе до исцрпеност или топлотен удар.


Луѓето со дијабетес дехидрираат побрзо на високи температури бидејќи внесувањето повеќе течности може да ја зголеми гликозата во крвта, а тоа доведува до почесто мокрење. Освен тоа, високите температури може да го сменат начинот на кој вашето тело го користи инсулинот. Дури и кога надвор не изгледа дека е топло, комбинацијата од топлина и влага во воздухот може да биде опасна бидејќи е потешко да се излади телото при поголема влажност.

Совети за дијабетичарите

Пијте многу вода, дури и кога не сте жедни, за да не дехидрирате. Се советува одбегнување алкохол и пијалаци со кофеин, кои може да го зголемат нивото на гликоза во крвта. Редовно проверувајте го нивото на гликоза во крвта доколку сте активни, а консултирајте се со лекар доколку мислите дека треба да ја промените дозата на инсулин.

Носете соодветна облека и користете крем за сончање и капа кога сте надвор. На високи температури, користете климатизер за да се разладите.

Извор: EKlinika