Сите образовни институции во Косово денеска стапија во генерален штрајк со основно барање за зголемување на платите на вработените во образованието, јави дописникот на МИА од Приштина.
Централниот штрајкувачки одбор во образовниот сектор бара покачување на предвидените коефициенти во нацрт-законот за платите на вработените во образованието и културата, до нивото на оној за службениците во другите јавни сектори, што би значело зголемување на сегашните плати за 30 отсто.
Освен тоа, се бара целосно спроведување на колективниот договор за образованието, склучен меѓу Министерството за образование, наука и технологија и Обединетите синдикати на образованието, науката и културата на Косово.
Нацрт-законот за платите моментално се наоѓа на разгледување во Комисијата за јавна администрација и медиуми во Собранието на Косово и се очекува со скратена процедура да биде усвоен на една од наредните собраниски седници.
Извор: МИА