Компанијата „Спејс-екс“ на милијардерот Илон Маск неодамна го информирала Пентагон дека не може повеќе да го финансира сателитскиот интернет-сервис „Старлинк“ во Украина, јави синоќа Си-ен-ен. Извештаи од фронтот во Источна Украина укажуваат дека „Старлник“ на многу места не работи, што ги отежнува акциите на украинската војска во ослободување на териториите окупирани од Русите.

Во писмото се бара таму каде што „Старлинк“ е во служба на украинската Влада и армија, финансирањето да го преземе Пентагон, што, според „Спејс-екс“, би чинело повеќе од 120 милиони долари до крајот на 2022 година и приближно 400 милиони долари за наредните 12 месеци.

- Не сме повеќе во состојба да донираме терминали за Украина, или да ги финансираме постојните терминали во недогледно време - напишал во писмото директор за владини закупи на „Спејс-екс“.

Во други документи од „Спејс-екс“ испратени до Пентагон е и барањето на генералот на украинската армија, Валериј Залужниј, директно испратено до Маск во јули за речиси 8.000 нови „Старлинк“ терминали. Од почетокот на војната, компанијата во Украина донирала околу 20.000 сателитски терминали за интернет.

Во писмото до Маск, генералот Залужниј ги пофалил „Старлинк“ како „извонреден сервис“ укажувајќи дека околу 4.000 терминали ѝ биле дадени на армијата. Сепак, околу 500 терминали месечно биле уништувани во борбите. Залужниј затоа побарал нови 6.200 терминали за украинската армија и разузнавачките служби и плус 500 месечно, како резерва за уништените.

На ова од „Спејс-екс“ подоцна одговориле наместо кај нив, генералот да се обрати кај Министерството за одбрана на САД.

Подоцна, Маск на „Твитер“ објави свои идеи за разрешување на воениот конфликт меѓу Русија и Украина, кои според многумина набљудувачи всушност се слични на барањата на Путин до Киев за Украина да ги отстапи источните територии и Крим и да остане неутрална. Имаше и извештаи дека пред да ги објави своите идеи, тој разговарал со рускиот лидер, но Маск веднаш го демантираше тоа.

Си-ен-ен дознава дека по критиките од многу страни и поединци, Маск во приватен разговор изјавил дека тој сѐ уште многу ја поддржува Украина, но се плаши од „огромна ескалација“.

Во разговорот тој, исто така, спорел зошто Украина не сака мировни преговори сега и дека ако тие би оделе со неговиот план, „Русија би ги прифатила условите“.

- Украина знае дека нејзините тековни владини и воени напори се целосно зависни од „Старлкинк“. Одлуката дали „Старлинк“ ќе работи или не, зависи главно од еден човек. Тоа е Илон Маск. Тој не е избран, никој не одлучил да му ја даде таа власт. Тој ја има поради од него изградените технологија и компанија - изјави извор кој учествувал во разговорите.

Од Пентагон јавуваат дека барањето на „Спејс-екс“ финансирањето да го покрие Владата е неосновано бидејќи околу 85 отсто од 20.000 терминали, и оваа бројка претходно ја потврди и „Спејс- екс“, биле платени или делумно платени од земји како САД или Полска. Овие ентитети исто така платиле околу 30 отсто од интернет-конекцијата, која според „Спејс-екс“ чини 4.500 долари месечно за терминал со најнапредни перформанси.