Сѐ повеќе италијански градови нудат руинирани домови за многу ниски цени.

Сицилијанскиот град Троина неодамна почна да нуди голем број напуштени куќи, додека Мусомели и Зунголи се некои од шармантните места во оваа европска земја кои почнаа слични шеми во текот на изминатите неколку години.

Но, градот Лауренцана, лоциран во регионот Базиликата во Јужна Италија, се издвојува од конкуренцијата „омекнувајќи“ некои правила за шемата за купување домови, која почна минатиот месец.

Иако регулативите може да се разликуваат во зависност од градот, ваквите шеми од купувачите обично бараат да предадат гаранција за депозит, обично помеѓу 2.000 и 5.000 евра, кои ќе им бидат вратени откако ќе го завршат реновирањето на имотот.

Сепак, оние што ќе купат некој од напуштените домови во овој италијански град нема да мора да дадат депозит.

- Сакаме да им помогнеме на новодојдените да ја купат куќата од нивните соништа, без да им отежнеме да ги следат досадните процедури и строгите барања. На моменти знае да биде тешко движењето низ регулативата, особено ако сте странец. Сакаме оваа авантура да биде задоволство, а не товар. Затоа не бараме никаква гаранција за депозит за да се осигуриме дека работите се извршуваат брзо. Се потпираме на вербата и посветеноста на купувачите, но постојано ќе ги следиме тековните работи и статусот на реновирањето - вели градоначалникот Микеле Унгаро.

Властите одлучиле да ги сведат на минимум трошоците за документација, додека купувачите ќе имаат корист од релативно ниските локални даноци во Јужна Италија.

Сепак, како и кај повеќето шеми „Купи куќа за едно евро“, купувачите мора да се согласат да го завршат реновирањето на имотот во одредена временска рамка.

Во овој случај, работата треба да почне не подолго од три месеци по купувањето и треба да биде завршена во рок од три години. Исто така, од купувачите се бара да достават детален план за редизајнирање пред да се разгледа нивната понуда.

Всушност, Унгаро советува оние што се заинтересирани да почнат да работат на предлогот дури и пред да стапат во контакт со неговиот тим.

Напуштените куќи за продажба во Лауренцана имаат различни големини, а поправките се разликуваат од имот до имот. Затоа се охрабруваат кандидатите да наведат приближно за која големина се заинтересирани и за каква цел, без огледа дали станува збор за планови за приватна летна куќа, хотелче или продавница. Домовите се движат од 40 до 150 квадратни метри.

Иако на потенцијалните купувачи ќе им бидат обезбедени фотографии од куќата, тие ќе треба сами да го посетат имотот за да ја официјализираат продажбата. Но, бидејќи многу ограничувања за патувања сè уште се во сила поради пандемијата, а делови од Италија се под регионална блокада, тешко дека каква било продажба ќе биде завршена во следните неколку месеци.

Сепак, Унгаро сака да ја направи шемата што е можно попривлечна.


Во моментов има околу 10 стари куќи во историскиот центар за едно евро. Иако биле напуштени пред неколку децении од локални семејства кои мигрирале во потрага по посветла иднина, градоначалникот вели дека тие сè уште се во добра состојба. Во меѓувреме, уште 40 празни згради на кои им е потребно одржување бараат нови сопственици.

Според Унгаро, купувачите треба да бидат подготвени да вложат најмалку 20.000 евра со цел да ги вратат имотите во нивниот поранешен сјај. Покрај тоа, има голем број редизајнирани домови по ниска цена, а Унгаро вели дека сопствениците би биле отворени и за преговори.

Бидејќи цената за квадратен метар во Лауренцана е приближно 500 евра, за 25.000 евра може да се купи готово живеалиште од 50 квадратни метри.

Бидејќи овој регион е прилично надвор од радарот на туристите, метежот не е проблем и Лауренцана е едно од најосамените гратчиња. Но, оживува во текот на пролетта и летото, кога многу семејства се враќаат во градот за да уживаат во топлото време. Населението во градот почнало да се намалува откако локалните жители почнале да емигрираат поради работа, главно во Германија и во Швајцарија на почетокот од 20 век, оставајќи зад себе живописни живеалишта со дебели камени црвено-кафеави ѕидови. Ова довело до архитектонски пад на прекрасната стара област, нешто што градоначалникот планира да го обнови. Во градот моментално живеат околу 1.700 жители во текот на целата година.

Лауренцана се наоѓа блиску до градот Матера, светско културно наследство на УНЕСКО, како и популарни локации покрај море, како што се Маратеа, Праија а Маре, Скалеа, Капо Палинуро и Марина ди Камерота.

Средновековниот замок на карпите некогаш служел како манастир. Легендата вели дека замокот крие околу 365 тајни соби, по една за секој ден од годината. Замокот често се користи за конференции и изложби, додека неговата пештера е претворена во музеј.

Оние што ќе одлучат да купат еден од имотите и да се преселат тука, ќе можат да уживаат во различните фестивали што се одржуваат тука во текот на целата година. Еден од најпопуларните е летниот карневал, кога четири населби се натпреваруваат во средновековни игри.

Извор: Edition.cnn.com
Фото: Instagram