Украинскиот фотограф Станислав Сеник направил серија фотографии од млади украински матуранти што позирале меѓу урнатините на својата земја.

На фотографиите се прикажани студенти како седат среде урнатини и позираат пред бомбардирани згради.

- Овие фотографии се историја. Луѓето сметаат дека сите овие лоши работи што се случија сега се во минатото, а матурантите му покажуваат на светот дека токму ова се случуваше. Но, овие ученици стануваат посилни. Имале лоши искуства и сега го продолжуваат својот живот - вели Сеник.

Тој смета дека е важно фотографирањето на околу 40 матуранти од училиштата во Чернигов откако од прва рака беа сведоци на ужасите на војната, која трае веќе четири месеци.

- Сигурен сум дека сето ова е важно да се документира. За 10 до 15 години, кога ќе имаат свои деца, ќе можат да им ги покажат овие фотографии - додава тој.

Една од ученичките, 17-годишната Олха Бабинетс, вели дека уживала во фотосесијата иако тоа искуство било тешко за сите.

- Сакавме да покажеме дека живееме во таква реалност и сакавме другите да видат како ни е нам. Но, сакавме да ја покажеме и нашата болка, која ја има и не стивнува. Беше многу емотивно, но се обидовме да издржиме. И мислам дека успеавме во тоа - вели таа.

Фотографиите ќе бидат дел од дипломскиот албум на матурантите. Но, фотографот сака да најде и изложбен простор за да ги прикаже и продаде фотографиите, а собраните пари да ги донира за украинските војници.

Фотографиите се направени во градот Чернигов, северно од Киев, блиску до границата со Белорусија. Градот беше назначен за град-херој за време на руската инвазија на Украина во 2022 година.


Извор: Petapixel.com
Фото: Stanislav Senyk/