Повеќе од 49.000 вработени во „Џенерал моторс“, американски автомобилски концерн, денеска почнаа штрајк откако пропаднаа преговорите меѓу компанијата и работничкиот синдикат за нов договор и подобри работни услови.

Работниците затворија 33 производствени погони во девет држави низ САД, како и 22 магацини со делови. Не е познато колку долго ќе трае штрајкот. Ова е прв штрајк од вакви размери по оној во 2007 година, кога компанијата изгуби 300 милиони долари за два дена од штрајкот.

Од Синдикатот велат дека штрајк во моментов е единственото решение бидејќи двете страни се далеку од постигнување спогодба за нов четиригодишен договор.

Од „Џенерал моторс“ соопштија дека понудиле 7 милијарди американски долари за зголемување на платите, што исто така ќе резултира со создавање на 5.400 нови позиции што ќе ги заземат тековните вработени.

Претходниот четиригодишен договор на синдикатот со компанијата истече во саботата, а преговорите се предвидени да продолжат денеска во десет часот по локално време.