Според документите кои ЦИА неодамна ги објавила за Израел, приказната за тоа дека јавноста верувала дека Америка знае или може да знае сè за Израел, не е точна.

Впечатокот што го имала јавноста во ерата пред компјутерите дека САД прислушуваат, фотографираат, шпионираат и имаат агенти во врвот на владата и војската, бил погрешен. Тоа го покажуваат илјадниците објавени документи на ЦИА кои се однесуваат на Израел, а кои во последните недели им станаа достапни на сите.

Како што се наведува, поголемиот дел од милионите страници ги произвела ЦИА, но има и материјали што ги прибавиле министерствата за одбрана и надворешни работи, и други разузнавачки служби.

Некои од тие материјали биле достапни и претходно, но за нивно читање било неопходно пријавување во Националните архиви во предградие на Вашингтон.     

Сепак, не е сè објавено, бидејќи поедини параграфи, па и цели страници за нуклеарни информации се цензурирани.

Тоа открива дека Американците одвај да знаеле по некоја тајна и дека имале голем број лажни информации, идеи, трачеви.

ЦИА била целосно несвесна дека израелската премиерка од 1969 до 1974 година, Голда Меир, боледувала од терминален лимфом, а агентите го откриле тоа откако починала, во 1978 година.

Во еден доверлив документ било напишано: „ние апсолутно немавме поим за нејзината фатална болест“.

ЦИА формирала тим да го проценува физичкото и менталното здравје на светските лидери, па на крајот од седумдесеттите тоа одделение во фокусот ја имало здравствената состојба на лидерите на Советскиот сојуз, најмногу на Леонид Брежњев, но и на тие после него.

Причината за тоа, според наводите, била разбирлива, бидејќи од 1982 до 1985 година, еден по друг починале Брежњев, Андропов и Константин Черњенко, отворајќи му место на Михаил Горбачов.

Физичката и психичката состојба на различни лидери и односот на силите во лидерството имале пресудно влијание на формирањето на советските политики и безбедноста на САД, како и мирот во светот.