Очекуваме во јуни да почне имплементацијата на проектот „Младинска картичка“. До крајот на овој месец ќе објавиме повик за да аплицираат младите. Го имаме направено дизајнот на картичката и очекувам најмалку триесетина илјади млади да аплицираат за да можат да ја добијат и да имаат соодветен попуст.
Картичката е наменета за сите млади на возраст од 15 до 29 години зашто заслужуваат да имаат подобро секојдневие, поволности и бенефиции. Ова е една од мерките што е во насока да ги задржи младите, да им понуди квалитетен живот со цел да почнат да размислуваат и да останат во државата, изјави за МИА директорот на Агенција за млади и спорт (АМС), Дарко Каевски.
Проектот „Младинска картичка“, како што рече, го најавивме кон крајот на 2018 година и е резултат на повеќе средби што ги имавме со младинските организации, каде што ни беше посочено дека тоа недостига во нашата држава, а во сите западноевропски држави постојат бенефиции и можности за младите.
- Сакаме да покажеме дека државата се грижи за младите, гради стратегија, има проекти и мерки за да им се олесни нивното секојдневие - посочи Каевски.
Дарко Каевски
Фото: МИА
Додаде дека од ноември се преземени доста активности, а во моментов има од 300 до 500 субјекти: кафулиња, ресторани, театри, киносали, транспорт, железница и други што ќе дадат одредени попусти во нивните услуги. АМС има склучено Меморандум со сите овие субјекти и ќе им биде дадена една налепница што ќе ја залепат на своите објекти.
Каевски информира дека таа ќе биде и европска картичка, односно младите ќе можат да уживаат во поволностите и во другите европски држави. Очекува од година на година да се надградува. Се разговара со Министерството за образование и наука по неколку години да може да биде и платежна картичка, да може студентите да добиваат стипендии на неа, да има преку неа и субвенционирани оброци и други мерки што ќе се преземаат.
Тој нагласи дека картичката е бесплатна. Повикот ќе биде за да се пратат податоци за младите луѓе и фотографија. Донесена е одлука на Влада во проектот дополнително да се вклучат сите институции, како министерствата за образование и наука, за транспорт и врски, за култура…
Извор: МИА