Во неколку продавници во САД се поставени автомати со муниција. Автоматите се направени од „Американ раундс“ и им овозможуваат на клиентите постари од 21 година да купат муниција со иста леснотија како и користењето банкомат, велат од компанијата.
- Нашите автоматизирани диспензери за муниција се достапни 24/7, осигурувајќи дека можете да купите муниција без ограничување на работните часови на продавниците и долгите редици - пишува „Американ раундс“ на својата веб-страница.
Од компанијата велат дека нејзините автомати имаат вградена технологија со вештачка интелигенција, можност за скенирање картички и софтвер за препознавање лица. Софтверот може да го потврди идентитетот на купувачот и да утврди дали машината се совпаѓа со скенираната идентификација.
Извршниот директор на „Американ раундс“, Грантс Магерс, вели дека има осум инсталирани автомати во четири држави. Првиот автомат беше поставен во продавницата за храна „Фреш валју“ во Пел Сити, Алабама. Оттогаш, четири се инсталирани на локациите на „Супер си март“ во Оклахома и еден во маркетите „Луи“ во Кањон Лејк, Тексас и уште еден во истиот синџир на маркети.
Фото: Аmerican Rounds
- Имавме над 200 барања за автомати кои покриваат приближно девет држави во моментов, а бројката расте секојдневно. Моментално, муницијата се продава на полиците на продавниците или онлајн. Овие средини доведуваат до ненамерна продажба на малолетни купувачи или до висока стапка на кражба. Она што ни се допадна во врска со овој концепт е дека автоматите користат најсовремени скенери за лична карта во комбинација со препознавање лице пред да се изврши трансакцијата - вели Магерс.
Тој додава дека нема да има ограничувања за количеството муниција што клиентите ќе можат да го купат, освен кога машините ќе останат без резерва, а проценува дека машините ќе се дополнуваат на две до четири недели.
Голема е веројатноста автоматите да предизвикаат контроверзии во време кога контролата на оружјето е тема која предизвикува поделби низ Америка.
Извор:
Newsweek.com
Фото: American Rounds