Пандемијата на коронавирусот доминира во вестите, на социјалните мрежи и во нашите секојдневни животи. Соодветно се зголемуваат мерките за спречување на ширењето на вирусот и нивниот ефект врз ранливата популација.

Сепак, патувањето останува најдобар начин да се покажат интернационалните врски и култури. Засега, бидејќи мора да се грижиме за здравјето, ќе треба да бидеме виртуелни патници. Учењето и откривањето нови места не мора да запре. 

Виртуелна авантура низ Големиот Кањон

Големиот Кањон може да го видите преку фотографиите со 360 степени, да одите на виртуелна прошетка или да летате над реката Колорадо со падобран.


Гледајте лами во Мачу Пикчу

Високо на планините на перуанските Анди се наоѓа Мачу Пикчу, стара тврдина изградена во 15 век. Посетата на ова место може да ви донесе прекрасни планински погледи, дружење со ламите и извонредни прошетки низ старите рушевини.


Талкајте низ Систинската капела во Италија

Лоцирана во Ватикан, Систинската капела е позната по ренесанските фрески. Во живо, капелата е преполна со луѓе и може да биде тешко да уживате во уметничките дела со сите нивни детали. Виртуелната тура не е само одличен начин да се цени капелата без да ви пречат многу луѓе, туку може и да ги видите градините, вилите и музеите.


Посетете ја земјата на создавањето

Ерусалим е дом на трите монотеистички религии: јудаизмот, христијанството и исламот. Базиликата на Светиот гроб е една од најпосетените локации во Ерусалим. Лоциран во христијанскиот дел на стариот град во Израел, овој религиски објект е место каде што Исус бил распнат на крст, каде што бил најден празниот гроб и каде што се верува дека воскреснал.


Тура низ Белата куќа

Посетувањето на Вашингтон не се препорачува во моментов, но сепак може да одите на виртуелна прошетка низ Белата куќа. Можете да ги видите канцеларијата на потпретседателот, библиотеката со книгите за законот како и разните уметнички дела што ја исполнуваат куќата.


Посетете го музејот „Гугенхајм“ во Њујорк

Овој музеј во Њујорк е еден од најпрекрасните структури дизајнирани од страна на Френк Лојд Рајт. Белата спирална платформа се протега од дното до врвот на организиран и прекрасен начин.


Разберете го природниот свет во Вашингтон

Националниот природонаучен музеј на САД, дом на 125 милиони артефакти, е една од најпосетуваните институции на планетата. Посетете ги излозите од вашиот компјутер или мобилен телефон преку виртуелна тура. Бидете трпеливи додека се вчитуваат страниците за одблизу да ги видите предметите.


Посетете ги Статуата на слободата и островот Елис во Њујорк

Доколку не сте биле во Њујорк, тогаш Статуата на слободата на островот Либерти и националниот музеј „Елис“ на истоимениот остров се сигурно на вашата листа со места што сакате да ги посетите. Двата острова вреди да се посетат.


Насмевнете ѝ се на Мона Лиза во Париз

Музејот „Лувр“ во Париз е најголемиот музеј за уметнички дела во светот, дом на повеќе од 35.ооо изложени дела, вклучувајќи ја и „Мона Лиза“, дело на Леонардо да Винчи. Вие може да го посетите музејот виртуелно од вашиот дом. Ова онлајн-искуство може да ви биде и добро истражување за во иднина кога ќе патувате во Париз.


Видете ги богатствата на Британскиот музеј во Англија

Дом на стари грчки вазни, египетски мумии и скулптури од Астеците, музејот е една од најпопуларните туристички атракции во Лондон. Видете импресивни примери за човечката историја, уметност и култура преку виртуелната тура.


Научете за историјата на Амстердам

Државниот музеј во Амстердам е еден од најпосетуваните музеи во градот, а има и зошто. Тука може да ги видите делата од златната доба на Холандија. Самиот објект е уметничко дело и вреди да се види.


Лебдете над Кинескиот ѕид

Ѕидовите на тврдината, кои се протегаат илјадници километри, биле изградени во северниот дел на Кина за да се заштити државата од освојувачите и да се контролира размената на стоки. Кинескиот ѕид е познат како едно од најимпресивните и најзначајни археолошки човечки дела во историјата.

Автор: Венди Алтшулер

Извор:Tripsavvy.com