Во пресрет на Светското фудбалско првенство 2026, милиони навивачи бараат билети, сместување и сувенири, а експертите предупредуваат дека токму тоа го зголемува просторот за интернет-измами
„Касперски“ забележува пораст на измамничките кампањи поврзани со првенството — од лажни страници за продажба на билети и сувенири до е-пошта во која се нуди наводна парична помош од 500.000 долари. Компанијата предупредува дека целта на таквите измами е кражба на пари и лични податоци.
Меѓу откриените примери се издвојува лажна веб-страница за продажба на билети. Таа визуелно ги имитира официјалните канали на првенството, користејќи ги препознатливите бои и графичкиот идентитет за да остави впечаток на веродостојност.
На купувачите им се нуди плаќање во повеќе валути и уверлива, но лажна постапка за регистрација, а дополнителна веродостојност измамниците се обидуваат да создадат преку контакт преку апликации за размена на пораки. По уплатата, жртвите не само што остануваат без пари, туку и без контрола над банкарските и личните податоци што претходно ги внеле.
Истражувачите откриле и лажна продавница што нуди наводно официјални производи од првенството, вклучувајќи маици, кадифени маскоти и сувенири по исклучително намалени цени.
За да ја стекне довербата на купувачите, страницата прикажува ознака „доверлива продавница“, а потоа бара внесување на лични и банкарски податоци. Токму ваквото барање, предупредуваат експертите, е еден од најочигледните знаци за измама.
Се ветува награда од 500.000 долари, наводно наменета за авионски билети, влезници и сместување
Измамите се шират и преку е-пошта. Во еден од забележаните случаи на навивачите им биле испраќани пораки што изгледале како официјална комуникација поврзана со првенството.
Во пораките се споменувала наводна одлука на телото за решавање спорови, а се правеле обиди корисниците да се наведат да кликнат на линк. Таквите линкови воделе до фишинг-страници наменети за кражба на чувствителни податоци.
Во други пораки, се ветува награда од 500.000 долари, наводно наменета за авионски билети, влезници и сместување за време на првенството.
За исплата на овој наводен износ, од примачот се бара да му се јави на испраќачот, што е класичен пример на интернет-измама. Експертите предупредуваат дека возбудата околу големите спортски настани често ја намалува претпазливоста на корисниците.
„Касперски“ предупредува и на пораст на несаканата пошта (спам) и на сомнителните огласи за производи поврзани со првенството. Зад привлечните понуди често се кријат измами што можат да завршат со финансиска штета и кражба на податоци.
Фото: freepik