Два клучни фактори ја направија Естонија рајска градина за започнување бизнис. Прв е фактот дека во 1994 година Естонија меѓу првите земји во Европа воведе рамен данок, односно пропорционална даночна стапка и така им ги одврза рацете на оние што добро си ја работат работата. Другиот фактор кој денес ја прави Естонија земја на иднината е нејзиното единствено е-управување, поради што важи за најатрактивна земја за инвестирање во Европа. Во 2009 година во оваа земја е соборен Гинисов рекорд кога станува збор за времето потребно за регистрација на фирма - 18 минути и 3 секунди.

Прва сајбер-војна во историјата на светот

Но, воспоставувањето на дигиталната република во Естонија значеше и низа препреки. Естонија по повеќе од педесет години минати под советска чизма, во 1991 година се избори за независност и во последните две децении смело се впушти во воспоставување, одржување и унапредување на својот дигитален екосистем - дури и тогаш кога поради тоа паѓаше на колена.


Леснотија во работење

Една од најзначајните димензии на оваа „Европска Силициумска долина“ секако е поедноставеното и софистицираното работење или како што Естонците сакаат да ја наречат, работата „на далечинско“. Покрај тоа што станува збор за земја со најефикасна дигитална администрација - владата во Естонија од 2011 година нема испечатено ниеден службен весник - Естонија воедно е и земја која го дигитализира претприемништвото, овозможувајќи им на Естонците и на остатокот од светот непречено да основаат и да управуваат со бизниси од кој било дел во светот. Доволно е да се направи регистрација на е-бизнис регистарот, да се пополнат неколку полиња и потоа во е-порака да се добие потврда за регистрација.