Ако обрнувате внимание на трендовите во исхраната, веројатно сте слушнале, или можеби дури и сте се обиделе да ја примените кето-диетата.

Кетогената диета

Кетогената диета вклучува внесување висок процент на масти и малку јаглехидрати. Ова го принудува телото во метаболичка состојба наречена кетоза, која вклучува согорување на маснотии за енергија, наместо гликоза. Исхраната, исто така, води до намалување на нивото на шеќер и инсулин во крвта.

Иако кето-диетата е тренд сега, првпат била воведена во 20-тите години како третман за епилепсија кај децата и има јасен доказ дека се работи за ефикасен третман.

Истражувачите ја истражуваат кето-диетата како третман за Алцхајмерова болест. Тие веќе утврдиле дека Алцхајмеровата болест ја намалува способноста на мозокот да користи гликоза. Студиите откриле дека способноста на мозокот да ја метаболизира гликозата е нарушена 15 години пред почетокот на клиничките симптоми за Алцхајмерова болест. Прелиминарните докази посочуваат дека кето-диетата може да обезбеди алтернативен извор на енергија - кетонски тела, како извор на гориво за мозокот.

Систематски преглед неодамна објавен во списанието „Граници во невронауката“ ги разгледува ефектите од кето-диетата врз луѓето со Алцхајмерова болест - и на молекуларно ниво и со когнитивни процени.

Алцхајмеровата болест доведува до таложење на наслојки наречени амилоид бета во мозокот. Истражувачите откриле дека кето-диетата помага да се придвижат овие наслојки преку заштитната бариера на мозокот, што може да ги намали складирањата на наслојките во мозокот. Прегледот, исто така, открил докази дека кето-диетата ги намалува маркерите на дисфункција на астроцитите, клетки во облик на ѕвезда во мозокот, кои помагаат да се обезбедат мозочните клетки со електролити и енергија, а и помагаат во поправка на оштетувањата. Откриено е дека кето-диетата помага да се намалат нивоата и на неврофиламенти, биомаркер типично присутен кога има оштетување на невроните во мозокот. Сумирањето на студиите заклучува дека кето-диетата го намалува воспалението и оксидативниот стрес на телото, нешта кои се поврзани со Алцхајмеровата болест.

Што е најважно, студиите откриле подобрувања во когнитивните перформанси кај луѓето што следат кето-диета. Тие вклучуваат подобрувања на меморијата, извршната функција и брзината на обработка на податоците. Подобрувањата биле најизразени кај луѓето со благо когнитивно оштетување, претходник на Алцхајмерова болест. Иако кето-диетата ветува дека помага во справувањето со Алцхајмеровата болест, авторите на студијата забележуваат дека се потребни повеќе истражувања за да се утврди дали диетата е ефикасна во спречувањето на прогресијата на болеста.

Исто така, важно е да се напомене дека кето-диетата може да доведе до здравствени проблеми, особено кај луѓето со зголемен ризик од срцеви заболувања.

- Една од најважните работи што научниците ги научија за Алцхајмеровата болест е дека процесите на болеста започнуваат со децении пред луѓето да покажат когнитивни симптоми. Штом ќе се појават симптомите, мозокот веќе претрпел непоправлива штета. Помирувањето со ова значи дека мора да се фокусираме на превенцијата. Овој вид истражување ни помага да разбереме како она што го јадеме може да има моќ да ја промени нашата когнитивна патека на стареење во текот на многу години - истакнала Елизабет Рајли, постдокторски истражувач за неврологија при Универзитетот „Корнел“.

Порака-заклучок: кето-диетата покажува одредено ветување дека помага да се запре прогресијата на Алцхајмеровата болест, но потребни се повеќе истражувања пред да може да се користи како стандарден третман.

Извор: Psychology Today

Фото: Freepik