Очекуваниот животен век на луѓето ќе се зголеми за речиси 5 години до 2050 година, објави научното списание „Лансет“. Кај мажите тоа ќе се зголеми од 71,1 на 76 години, а кај жените од 76,2 на 80,5 години.

Најголем пораст се очекува во земјите каде што очекуваниот животен век во моментов е помал. Трендот во голема мера е резултат на мерките за јавно здравје кои ја подобрија стапката на преживување од кардиоваскуларни болести, ковид-19 и низа заразни болести, како и болести на мајките, новороденчињата и болести поврзани со исхраната, велат експертите.

Се предвидува вкупниот животен век на човекот да се зголеми од 73,6 години во 2022 година на околу 78,1 години во 2050 година, што е зголемување за 4,5 години.

Иако се предвидува дека очекуваниот животен век во светот ќе се зголеми до 2050 година, напредокот е побавен отколку во трите века претходно. Истражувањето покажува дека актуелните трендови кај незаразните болести, како што се кардиоваскуларните болести, ракот и дијабетесот, како и изложеноста на ризик-факторите поврзани со незаразните болести, како дебелината, високиот крвен притисок, нездравата исхрана и пушењето, имаат најголемо влијание врз здравствените проблеми на следната генерација.

Продолжувањето на животниот век не е придружено со продолжување на здравјето во иста мера. Просечниот број на години што едно лице може да очекува да ги помине во добро здравје ќе се зголеми од 64,8 години во 2022 година на 67,4 години во 2050 година, што е зголемување за само 2,6 години.

Иако се очекува повеќе луѓе да живеат подолго, исто така се очекува тие да поминат повеќе години во лошо здравје. Вкупниот број на изгубени години поради лошо здравје и рана смрт кои се припишуваат на метаболички ризик-фактори, како што се високиот крвен притисок, висок шеќер во крвта и висок индекс на телесна маса, се зголемил за речиси 50 отсто од 2000 година, покажа истражувањето.

Анализата ги базираше своите процени на 88 ризик-фактори и нивните поврзани здравствени резултати за 204 земји и територии од 1990 до 2021 година.

Извор: Deutsche Welle
Фото: Freepik