Колку и да имате брза интернет-врска, секогаш имаме чувство дека може да биде побрзо. Но, брзината што ја постигнаа научниците од Австралија, тешко е воопшто да се замисли.

Научниците од универзитетите „Монаш“, „Синбурн“ и РМИТ успешно тестирале и забележале најголема брзина на пренос на податоци преку интернет благодарение само на еден оптички чип. Нивната брзина изнесувала неверојатни 44,2 терабајти во секунда. Колку е тоа брзо најдобро зборува податокот дека со таа брзина можат да се преземат 1.000 филмови со висок квалитет во помалку од една секунда. Користејќи ја оваа брзина, 1,8 милиони луѓе би можеле истовремено да користат иста широкопојасна интернет-врска без никакви проблеми.

Научниците, чиј успех е забележан во престижното списание „Нејчр Комјуникејшнс“, истакнуваат дека нивното откритие би можело целосно да ги промени животите на милијарда луѓе кои моментално работат од дома.


Истражувачите посочуваат дека овие податоци можат да им помогнат да проценат како ќе се однесуваат нашите оптички мрежи за неколку години, кога количината на податоци што патуваат низ нив се зголемува повеќе. Тие се надеваат дека ќе можат да направат нови уреди во иднина што можат да ја зголемат брзината на оптичката мрежа од неколку стотици гигабајти во секунда до десетици терабајти во секунда, без зголемување на големината или цената.

- Се надеваме дека на долг рок би можеле да создадеме чип што ќе овозможи вакви брзини за пренсување податоци преку постојни оптички кабли со минимална цена - велат научниците.