Истражувачите од Медицинскиот факултет при Универзитетот „Јеил“ развија нов вид третман за ковид-19 дизајниран да ја стимулира имунолошката одбрана на телото и да се бори против инфекцијата во нејзините најрани фази. Во претклиничките тестови на животни, експериментална молекула на РНК им помогнала на глувците со намален имунитет целосно да го исчистат вирусот од нивниот систем.

Кога клетката е инфилтрирана од вирус, таа ослободува протеини наречени интерферони. Овие протеини им сигнализираат на другите клетки дека патогенот е во близина, предизвикувајќи голем број антивирусни одбрани и попречувајќи ја способноста на вирусот да се реплицира.

Некои вируси еволуирале и создале паметни методи за задушување на одговорот на интерферон, дозволувајќи му на вирусот повеќе време да се реплицира пред другите одбранбени средства на имунолошкиот систем да стигнат.

Неколку рани студии за САРС-КоВ-2 открија дека оние што имале тешка клиничка слика на ковид-19 покажале ниски нивоа на производство на интерферон тип 1 во најраните фази на инфекција. Така, стимулирањето на првичниот интерферонски одговор на телото може да биде ефективен ран третман за ковид-19.

За да го направат ова, истражувачите развија синтетичка РНК-молекула наречена СЛР14. Молекулата е дизајнирана да имитира генски материјал од САРС-КоВ-2 и последователно да активира специфични рецептори наместени да произведуваат интерферони тип 1.

Низ серија тестови на животни истражувачите покажаа единечна доза на СЛР14 што заштитува од тешки болести и смрт доколку се администрира непосредно пред изложување на вирусот или веднаш по почетната инфекција. Утврдено е дека молекулата на РНК е ефикасна против сите тековни циркулирачки варијанти на САРС-КоВ-2, вклучително и делта-сојот.

Истражувачите, исто така, го тестирале третманот кај глушец со намален имунитет. Овде животните страдаа од хронични САРС-КоВ-2 инфекции и третманот со СЛР14 беше доволен за да се стимулира имунолошки одговор кој целосно го искорени вирусот.

- Овие резултати покажаа дека употребата на СЛР14 се протега надвор од профилактичките антивирусни средства - пишуваат истражувачите во новообјавената студија, но и терапевтски средства што може да им се дадат на пациенти со имунокомпромитирани состојби.

Извор: Newatlas.com
Фото: Freepik