Возењето со електричен тротинет е поевтино од она со сопствен автомобил или со такси, помалку е заморно од возење со велосипед и е подобро за Земјата од останатите превозни средства кои ја загадуваат. Сепак, бројот на несреќи во кои се вклучени и овие превозни средства, од ден на ден сѐ повеќе се зголемува.
Светските медиуми деновиве ја пренесуваа веста за смртта на водителката и јутјуберка Емили Хертриџ, која настрадала во Лондон откако камион налетал на нејзиниот тротинет.
Експертите велат дека тротинетите се одлично превозно средство, но дека кацигите и безбедното возење се клучни за безбедноста на оние кои ги возат, но и на пешаците, кои во последно време исто така се жртви на несовесните возачи на електрични тротинети.
Сепак, постојат многу нешта кои можете да ги направите.
Носете кацига
Кацигата сепак е важна. Лекарите можат да „поправат“ скршена рака или зглоб, но не и многу сериозни повреди на главата.
Не возете пијани
Едно истражување покажало дека една третина од возачите на електрични тротинети признале дека консумирале алкохол 12 часа пред повредата која ја добиле при возење на тротинет. Возењето на електричен тротинет не е побезбедно од автомобилот. Ако сте консумирале алкохол, викнете некој да ве однесе, одете си дома пеш или користете јавен превоз.
Двајца на тротинет
Да, сѐ повеќе луѓе се возат во пар на еден тротинет, а има и родители кои ги возат своите деца. Тротинетот е направен за едно лице, тоа не е мотор. Повеќето тротинети имаат лимит од 100 килограми носивост. Возете се сами!
Невнимателно возење
Правилата за возење на електричен тротинет се различни во секоја земја или град. Важно е сами да се информирате. Ако возите заедно со автомобилите, давајте знаци со рацете, носете штитници, а ако морате нешто да превезете, ставете го во ранец, не закачувајте го на рачките или на едно рамо бидејќи можете да загубите рамнотежа. И најважно! Заборавете на мобилниот додека возите. Доколку проверувате навигација, запрете некаде.
Проверувајте го тротинетот
Пред да тргнете, прегледајте го тротинетот за да видите дали сѐ е во ред. На почетокот од возењето тестирајте ги кочниците. Ако забележите нешто сомнително, контактирајте го сервисот или местото од каде што сте го купиле тротинетот.
Вежбајте на почетокот
Само затоа што сте возеле тротинет додека сте биле дете или затоа што сега возите велосипед не значи дека ќе бидете феноменален возач на електричен тротинет. Тој е помалку стабилен при наидување на дупки од велосипедот бидејки тркалата му се помали. Затоа убаво е кога ќе го купите прво да вежбате на празен паркинг, па потоа да се вклучите во сообраќајот. Вежбајте тргнување и запирање, забрзување и забавување, маневрирање околу пречки. Колената држете ги благо свиткани за да бидете
постабилни.