Големиот виртуоз на виолина со светско реноме, Стефан Миленковиќ, заедно со својот колега, пијанистот Владимир Милошевиќ, утревечер во 21 часот во црквата „Света Софија“ ќе одржи концерт во рамките на „Охридско лето“.
Миленикот на сите генерации, кој секогаш приредува концерти за паметење, е еден од најталентираните уметници од овие простори, посочи Наташа Поповиќ, директорката на фестивалот.
- Миленковиќ во Србија ги носи титулите за Уметник на векот, Најхумана личност, Личност на годината. Миленковиќ повеќе пати настапува на најпрестижните концертни подиуми во светот, солистички или со бројни оркестри под диригентските палки на Сер Невил Маринер, Лорин Мазел, Владимир Федосејев и Даниел Орен. Убедена сум дека утрешниот концерт ќе биде впишан во листата најдобри концерти во фестивалската историја на Охридско лето. Тој ќе настапи заедно со Владимир Милошевиќ кој важи за еден од најистакнатите српски пијанисти на неговата генерација - рече Поповиќ.
Виолинистот Миленковиќ не го криеше задоволството што е повторно во Охрид, каде, како што рече, има прекрасни спомени од детството и многу пријатели. За концертот што ќе го одржи утре, тој најави дека станува збор за добро одбрана, летна, но квалитетна програма.
- Подготвивме атрактивна програма. Ќе има од се’ по малку. Сите дела со кои ќе настапиме се многу важни. Ќе почнеме со бетовеновата Соната број 1, неговата прва соната со многу енергија, ремек-дело зашто тој не објавувал ништо што не е совршено подготвено. Потоа ќе има еден балет, „Бакнежот на самовилата“ од Игор Стравински. Од него е направена свита во кусо издание од 20-тина минути. Во вториот дел започнуваме со македонска премиера, дела на италијанскиот композитор Никола Кампогранде со едно дело што го напишал по примерок на Паганини, поточно инпирирано од Паганини, а изведено на современ начин на виолина и пијано. Потоа ќе следува делото „Легенда“ од полскиот композитор Хенрик Виењавски. На крајот ќе отсвириме валц-скерцо од Петар Илич Чајковски, најави српскиот виртуоз на виолина Стефан Миленковиќ, не откривајќи какво изнедаување подготвува за публиката.
Милошевиќ истакна дека првпат настапува на фестивалот „Охридско лето“, но редовно ја следи и чита за фестивалската програма преку интернет.
- „Охридско лето“ е еден од најзначајните фестивали во овој дел од Европа, и токму поради тоа, голема е честа да се настапи овде. Секоја година ја следам програмата преку интернет и се радувам што има одлични концерти и фантастични уметници, рече Милошевиќ.