Античките костури што на северот од Италија беа пронајдени закопани држејќи се рака под рака и кои низ цел свет се познати како „Љубовниците од Мондена“, всушност, биле мажи, покажаа испитувањата.

Древните костури се откриени во 2009 година во Модена, а посмртните останки датираат од периодот меѓу 4 и 6 век од новата ера и биле во толку лоша состојба, што се мислело дека е невозможно да се одреди нивниот пол, па според положбата на костурите се претпостави дека во заедничката гробница има маж и жена.

Меѓутоа, новата технологија со која се проучуваат протеините од забната глеѓ им овозможила на научниците од Универзитетот во Болоња да докажат дека станува збор за костури на двајца мажи.


Научниците нагласија дека е невозможно да се одреди сексуалната ориентација на луѓето чии костури ги проучувале, наведувајќи дека тие можеби биле пријатели, браќа или соборци.

- Иако не можеме да ја исклучиме можноста тие да биле љубовници, не е веројатно луѓето што ги погребале да покажат таква близина, поврзувајќи ги нивните тела и ставајќи им ги рацете една во друга - наведуваат научниците.

Во времето на Јустинијан, во Источното Римско Царство меѓу 527 и 565 година истополовите односи се сметале за криминал.