Меѓу земјите од Западен Балкан, најдобро пласирано е Косово (57.), потоа Македонија (63., на ланската листа 64. – скок за едно место) и Босна и Херцеговина (70.). Црна Гора не е спомената на листата. Србија, која бележи пад во однос на лани, годинава е на 83. место, додека Албанија е на 87. место од вкупно 140 рангирани земји.

Од 2009 година индексот на вашингтонската невладина организација „World Justice Project“ го мери развојот на владеењето на правото, врз основа на осум фактори: ограничувања на владините овластувања, отсуство на корупција, отворена влада, фундаментални права, ред и безбедност, регулаторно спроведување, граѓанска правда и кривична правда. За овогодишниот Индекс на владеење на правото беа анкетирани повеќе од 154.000 домаќинства и 3.600 правни експерти.

Како примери за владеење на правото се издвојуваат Данска, Норвешка, Финска, Шведска и Холандија. Тие ги заземаат првите пет места во рангирањето на владеењето на правото. Германија е на шестото место бидејќи не добила најдобри оцени за транспарентноста на владините и административните активности. Меѓу другото, затоа што услугите не се доволно достапни за новинарите.

Во рамките на Европската Унија, Унгарија и Бугарија имаат најнизок рејтинг – 73. место и 60. место, Хрватска е на 47. место, а Словенија е на 31. место.

На самото дно на листата се Хаити, Демократска Република Конго, Авганистан, Камбоџа, а на последното место е Венецуела. Основните права, како што е слободата на изразување, не се доволно заштитени во тие земји. Исто така, работата на владата не е под соодветна контрола.