Владата на седницата која се одржа утринава донесе неколку одлуки со кои се намалуваат царинските давачки од 65, 55 и 45 отсто на 10 отсто за повеќето производи што спаѓаат во категоријата овошје и зеленчук, освен домати, краставици и пиперки, имајќи предвид дека ќе им се даде дополнителен рок на нашите производители на овие производи до 1 декември за да го снабдуваат и македонскиот пазар, информира министерот за економија Крешник Бектеши.

Тој нагласи дека според анализите на Министерството за економија, има зголемен извоз на земјоделски производи од нашата земја што се надополнува со увоз од соседните земји, што на крај негативно влијае врз домашните потрошувачи преку повисоки цени.

- Поради тоа што сме обврзани тој недостаток да го покриваме преку увоз, во моментот кога се прави увоз во овој период, за овие производи има царинска давачка од 65 отсто. На пример, ако еден земјоделски производ чини 100 денари при увоз, увозната цена, директно станува 165 денари, без никакви маржи да имаат трговците на мало или трговците на големо. Тоа е направено поради систематски пропусти и во таа насока треба Министерството за земјоделство во соработка со нас и со Министерството за финансии да ги усогласиме овие давачки, бидејќи крајната цел е граѓаните да плаќаат пониски цени. Ние можеме да го направиме тоа, во регионот сме конкурентни и секако дека во таа насока работиме - кажа Бектеши при денешното гостување во емисијата „10 минути“ на Телевизија 24.

Посочи дека е донесена и Одлука да се зголемат дозволените квоти за увоз на јужно овошје во земјава со што, како што кажа, очекува да се намалат цените на овие продукти во текот на годината.

-Зголемени се квотите за лимони, портокали, мандарини. Наместо 8.000 тони јужно овошје, се зголемува за 2.000 тони до крајот на годината и зимава ќе имаме пониски цени - појасни Бектеши.

Со цел да се почитуваат одлуките на Владата, инспекторите на Државниот пазарен инспекторат се постојано на терен и во изминатите неколку дена се затворени повеќе маркети во Куманово, Тетово, Гостивар и Струга кои не ги почитувале одлуките на Владата и не ги намалиле цените.

-Во делот на намалување на цените, согласно дописот на Министерството за економија, треба целосно да се почитува и Законот за заштита на потрошувачите. Таму се предвидени одредени работи во делот на неможност на трговците да ги стават во заблуда потрошувачите, да направат измама кон потрошувачите и да наведат ознака гарантирана цена, а при контрола таа цена да не биде намалена, согласно цените кои биле од 1 август, минус 10 отсто од тие цени. Според Законот, глобите се затворање на објектот се од 3 до 30 дена максимум, плус парична казна, согласно процената на инспекторите - рече Бектеши.

Согласно последните одлуки на Владата, намалени се царините на 10 отсто на: домат, свеж или разладен, краставици, благи и лути пиперки, кромид, праз, карфиол, брокула, главчеста салата, друга салата, моркови, модар патлиџан, тиквички. Оваа одлука стапува во сила од денот кога ќе биде објавена во „Службен весник“ и ќе трае до 28 февруари 2024 година.