Градската библиотека во Хелсинки и сите нејзини филијали испробуваат нов социјален експеримент кој им овозможува на читателите анонимно да им препорачуваат книги на другите читатели користејќи специјално дизајнирани означувачи со емотикони. Целта на библиотеката е да го поттикне и негува чувството на заедница.

Институцијата веќе ги користи препораките на професионални експерти, критичари и познати личности за да го води изборот на литература на читателите, но сега целта е тој процес да се направи персонализиран. На крајот на краиштата, интернетот покажа дека луѓето имаат мислења за сите видови работи што ги користат, гледаат и консумираат, и честопати сакаат да ги споделат со другите.

Постојат четири различни типа означувачи кои се користат во експериментот: остроумен, морничав, освежувачки и зачудувачки. Овие четири придавки се избрани затоа што се различни, опишуваат емоционални состојби и се разбирливи. Емотиконите се наоѓаат во близина на машините за враќање, така што клиентот може да ја вметне соодветната картичка помеѓу страниците на книгата што ја враќа и да ја остави книгата да ја најде нов читател.

- Во библиотеките има многу книги, па тешко е да одбереш нешто за читање. Клиентите се заинтересирани да ги гледаат книгите што другите ги вратиле и резервирале од количката за враќање и полиците за резервации. Така, ознаките го доловуваат овој феномен на интересен начин: им олеснуваат на читателите да најдат книги што другите ги препорачале - објаснува Ана-Марија Соининваара, директорка на библиотеката.

Успехот на овој пилот-проект за обележување книги ќе се следи и ќе се собираат повратни информации од читателите до крајот на годината. Со помош на искуства се донесуваат одлуки за развој на други емотивни ознаки и можно продолжување како дел од изборот на услуги.

Извор: Pametni gradovi
Насловна фотографија: Daniel Leiviskä/STT info