Проблем кој девојките и младите жени во западните земји не можат да си го замислат: неодење на училиште, дури и отпишување поради нивните месечни циклуси.

Сепак, дури половина од девојчињата во руралните делови на Етиопија пропуштаат часови од причини поврзани со нивниот месечен циклус - и тоа може да има уништувачки ефект врз нивното образование и остатокот од животот.

Фревеини Мебрахту го посвети својот живот убедувајќи ги девојчињата да останат на училиште, дизајнирајќи менструална влошка за повеќекратна употреба, обидувајќи се да ѝ стави крај на културната стигма околу проблемот. Токму поради нејзиното дело, таа е прогласена за херој за 2019 година од телевизиската куќа Си-ен-ен.

- Не знам што да кажам. Толку сум почестена и благодарна ѝ сум на телевизијата Си-ен-ен. Ова е за сите девојчиња и жени секаде низ светот. Достоинство за сите - рече таа.


Повеќе од 80 отсто од влошките што таа ги произведува им се продаваат на невладини организации што тие ги дистрибуираат бесплатно.

Таа лично знае бидејќи и сама се соочувала со истиот проблем.

- Се сеќавам дека постојано слушав дека е проклетство да имаш месечен циклус... тоа или значеше дека сум подготвена за брак или дека сум лоша - вели таа.

Мебрахту се здружи со непрофитната организација „Дигнити период“ за да ѝ стави крај на стигмата околу проблемот преку држење говори во училиштата и преку учење на девојките и момчињата дека месечниот циклус е природна работа и не е нешто за кое девојчињата треба да се срамат.

- Целта не беше само правење влошки, туку и напад на културниот багаж - вели таа.

„Дигнити период“ дистрибуирал повеќе од 150.000 бесплатни комплети за менструална хигиена купени од фабриката на Мебрахту. Податоците собрани од организацијата покажуваа дека во училиштата посетени од „Дигнити период“ имале 24 отсто повисока посетеност од девојчињата.

Како херој на годината за 2019 година од Си-ен-ен, Мебрахту ќе добие 100.000 долари за проширување на нејзината работа.