Основачот на технолошката компанија „Мајкрософт“, Бил Гејтс, неодамна одржал говор пред дипломци на Универзитетот во Северна Аризона. Тој никогаш не го завршил факултетот бидејќи ги напуштил студиите по само три семестри за да ја основа компанијата.

- Па, што знае човек кој се откажал од факултет за дипломирањето? Не многу, да бидам искрен - им кажал тој на дипломците.

Освен тоа, тој споделил неколку работи што самиот би сакал да ги слушне на дипломирањето кое никогаш го немал.

Вашиот живот не е претстава во еден чин

- Веројатно чувствувате голем притисок сега да ги донесете вистинските одлуки за вашата кариера. Можеби ќе ви се чини дека тие одлуки се трајни. Не се. Она што ќе го правите утре или во следните десет години не мора да биде тоа што ќе го правите засекогаш - рекол тој.

Никогаш не сте препаметни за да бидете збунети

- Мислев дека знам сè што треба да знам кога го напуштив факултетот. Но првиот чекор кон учење нешто ново е прифаќање на она што не го знаете наместо фокусирање на она што го знаете - според Гејтс.

Тој ги советувал дипломците да не паничат кога се соочуваат со проблем кој не можат да го решат самите, туку да се принудат да размислуваат за решение и да најдат паметни луѓе од кои ќе учат.

Гравитирајте околу работа која решава важен проблем

- Добрата вест е дека дипломирате во време кога има многу важни проблеми за решавање. Секојдневно се појавуваат нови индустрии и компании кои ќе ви овозможат да заработувате и да направите разлика, а со напредоците во науката и технологијата, полесно е да се направи голема промена - посочил Гејтс.

Не потценувајте ја моќта на пријателството

- Кога бев на факултет, се спријателив со друг студент со кој делев многу интереси, како научна фантастика и компјутерски списанија. Не знаев колку важно ќе биде тоа пријателство. Името на мојот пријател беше Пол Ален и ние го основавме „Мајкрософт“ заедно - рекол тој.

Гејтс открил дека кога бил млад, не верувал во одмор или викенди и ги принудувал сите околу него да работат многу.

- Но, како што стареев, а особено откако станав татко, сфатив дека има повеќе во животот од работата - рекол тој.

Извор: Indy100
Насловна фотографија: Facebook