Поимот за созревање и зрелост се менувал низ годините, а секоја генерација има сопствена дефиниција за тоа што некого го прави возрасна личност. Но, неодамнешно истражување спроведено на 2.000 испитаници од четири генерации покажа дека зрелоста најчесто се поврзува со една конкретна работа – способноста лицето само да си ги плаќа сметките.

Во истражувањето учествувале припадници на генерацијата З, милениумци, генерацијата Х и бејби-бумери. Еден од поинтересните наоди покажува дека дел од припадниците на генерацијата З сè уште не се чувствуваат возрасни, а чувството на вистинска зрелост во просек се јавува дури околу 27. година.

Сепак, кога испитаниците биле прашани што некого го прави возрасен, најчест одговор бил плаќањето на сопствените сметки. Тоа како клучен знак на зрелост го наведоа 56 отсто од испитаниците. Следуваат финансиската независност, која ја истакнаа 45 отсто, и ставањето на одговорноста пред забавата и личниот живот, што го навеле 38 отсто од испитаниците.

Генерациите не се согласуваат околу очекувањата

Иако многумина се согласуваат дека финансиската одговорност е важна пресвртница, генерациите се разликуваат во тоа кога младите треба да почнат сами да ги намируваат трошоците. Постарите испитаници главно сметаат дека тоа треба да се случи порано, додека помладите генерации имаат малку поблаги очекувања.

Тоа покажува дека чувството на зрелост не се сведува само на години, туку и на околности, самостојност и преземање секојдневни обврски.

Зошто не се чувствуваме како возрасни?

Иако плаќањето сметки многумина го гледаат како јасен знак на зрелост, тој чекор не значи дека лицето автоматски почнува да се чувствува како возрасно. Многумина со години работат, плаќаат трошоци и донесуваат важни одлуки, но сепак имаат чувство дека „немаат сè средено“.

Причината делумно лежи во тоа што големите животни пресвртници, како што се бракот, родителството или купувањето недвижен имот, денес се случуваат подоцна. Покрај тоа, многумина зрелоста сè уште ја замислуваат како состојба на целосна сигурност и контрола, иако повеќето луѓе постојано се приспособуваат на нови обврски.

Можеби нема секогаш да се чувствувате како возрасни, но ако самостојно ги намирувате трошоците и преземате одговорност за својот живот, веќе сте поминале една од најважните пресвртници на зрелоста.

Извор: Index.hr
Фото: Freepik