Смрт и даноци - две неизбежни работи во човечкиот живот. Барем засега. Според некои од најистакнатите футуристи, набрзо смртта нема да биде на тој краток клише-список.
Постои контроверзна идеја во футуристичката заедница наречена „брзина на бегството од долговечноста“. Иако звучи како научна фантастика, концептот е дека како што напредуваат технологиите за продолжување на животот, човечкиот животен век може да се зголеми побрзо отколку стареењето. На пример, додека сè уште старееме за временски период од една година, очекуваниот животен век би се зголемил за една година и два месеца, ефективно „враќајќи“ два месеца од нашиот живот.
Реј Курцвејл, поранешен инженер на „Гугл“ и познат футурист фокусиран на вештачката интелигенција, изјавил дека верува оти човештвото ќе ја достигне брзината на бегство на долговечноста до 2029 година.
- По 2029 година добивате повеќе отколку што губите - се враќате во времето. Штом ќе се вратиме барем една година, ја достигнуваме брзината на бегство на долговечноста - рекол тој.
Напредокот во медицината и во технологијата
Своите прогнози Курцвејл ги заснова на брзиот напредок на медицинската технологија.
- Вакцината против ковид беше развиена за 10 месеци и создадена за само два дена. Симулираната биологија сѐ повеќе се користи и тоа е една од причините зошто ќе направиме огромен напредок во следните пет години - објаснил тој.
Иако медицинските достигнувања го зголемуваат животниот век, концептот за брзината на бегство на долговечноста се фокусира токму на тоа, а не на апсолутната бесмртност.
- Постигнувањето на брзината на бегство на долговечноста не гарантира вечен живот, додава тој.
Случајноста на животот и болестите како ракот, дефинирани со случајни мутации, остануваат значајни пречки.
Курцвејл е познат по неговата импресивна точност во предвидувањето на технолошкиот напредок, како што е пролиферацијата на преносливи компјутери (мобилни телефони и лаптопи). Сепак, тој често грешел - никој не може со сигурност да ја предвиди иднината.
Дополнително, постигнувањето на брзината на бегство на долговечноста се потпира на статистички пресметки за просечниот животен век наместо на еднакво продолжување на животот за сите. Технолошкиот напредок не значи автоматска глобална достапност.
На пример, туберкулозата, болест која ја третираме со децении, сè уште одзема повеќе животи годишно од која било друга заразна болест, освен ковид-19. Медицината и технологијата брзо се развиваат и го зголемуваат просечниот човечки животен век. Сепак, идејата за брзината на бегство на долговечноста засега останува предвидување, а смртта и даноците остануваат неизбежни.
Извор: benchmark.rs
Фото: Freepik