Истражувачи од Универзитетот „Стенфорд“ идентификувале нов подвид на депресија кој би можел да влијае врз една четвртина од пациентите со силно депресивно нарушување. Резултатите помагаат да се објасни зошто најпопуларните лекови за лекување на депресијата не се секогаш ефикасни.

Научниците го нарекуваат овој новоидентификуван подвид на депресија „когнитивен поттип“, кој се разликува по неговите когнитивни недостатоци во вниманието, меморијата и самоконтролата. Овие симптоми често опстојуваат дури и кога на пациентите им се препишуваат антидепресиви кои дејствуваат на серотонинот.

Во клиничкото испитување во кое учествувале повеќе од 700 возрасни, истражувачите откриле дека 27 отсто од пациентите со тешко депресивно нарушување полошо ги извршуваат когнитивните задачи и помалку реагираат на стандардните лекови. Ако овој процент се однесува на населението во САД, тоа покажува дека приближно 5,7 милиони пациенти само во САД може да ја имаат оваа верзија на депресија.

Научничката Лаура Хек и нејзините колеги тврдат дека итно се потребни повеќе насочени третмани за депресија за ова значајно малцинство на пациенти.

- За значително малцинство пациенти со депресија, когнитивното подобрување е неопходно за да се подобри општото депресивно расположение и функција - истакнуваат авторите на студијата.

Според научниците, овој новоидентификуван когнитивен поттип го претставува првиот клинички активен когнитивен биотип на депресија. Ова покажува дека падот на когнитивните функции не е само последица на депресијата, туку може да придонесе и за нејзиниот развој. Научниците ја нагласуваат потребата од дополнителни истражувања за да се утврди дали резултатите може да се применат на други антидепресиви и методи на лекување.

Извор: Zimo
Насловна фотографија: Pixabay