Со поздравно обраќање на Н.Е. Кати Чаба - амбасадор на Канада во Србија, Македонија и Црна Гора, се отвори панел-дискусијата „Жени-претприемачи и канадски експерти: Менторство, развој и одржливост“, во организација на Македонија2025, која се одржа денеска во „Дабл три Хилтон“ - Скопје. На настанот присутните имаа можност да дискутираат за најдобрите практики поврзани со женското претприемништво во Канада и Македонија, најголемите предизвици со кои се соочуваат македонските жени-претприемачи, но и за нивната соработка со консултантите од канадската организација за извршни услуги CESO SACO.
„Драго ни е што соработуваме со кредибилна организација каква што е Македонија2025 на овој проект. Среќни сме што волонтерите од канадската организација за извршни услуги CESO SACO им помагаат со своето искуство и знаење на македонските женски организации, во насока кон постигнување поголема родова еднаквост, како и промоција на женското претприемништво воопшто“ – посочи Н.Е. Кати Чаба.
Консултантката од канадската организација за извршни услуги CESO SACO, Џенифер Лавуа, изјави дека своите знаења ги пренесуваат на начин применлив за македонските клиенти и бизниси.
„Навистина ми е драго што сум во прекрасната Македонија. Тука сме да менторираме, водиме, слушаме. Изминатите две недели работев со ЕЛИТ
– Здружение на жени-менаџери и со Здружението на бизнис-жени - Македонија. Тие се навистина мотивирани да направат позитивна промена во македонската економија, па така заеднички работиме на надминување на предизвиците и зајакнување на женскиот глас во општествениот живот.“
Изабела Соколовска, претседател на Институтот за развој на креативниот и иновативниот потенцијал кај млади и возрасни луѓе - Creative Macedonia, го пренесе своето директно искуство за соработката со канадскиот експерт Денис Џоунс.
„Нашиот канадски експерт, Денис Џоунс, несебично го сподели своето искуство со нас и со девојките и жените со кои ние соработуваме. Неговото долгогодишно искуство и неговата несебична поддршка ни го отворија патот кон изнаоѓање решенија за проблемите со кои се соочуваме. Видливост, промоција, поддршка, претприемништво, напредок? Благодарение на Џоунс, веќе имаме планови како да ги надминеме препреките поврзани со овие поими, но клучно е што тоа не се решенија произлезени од униформноста на справувањето, туку од креативноста на нашите битија.“
Панел-дискусијата се организира во рамките на проектот финансиран од канадскиот фонд за локални иницијативи, поддржан од Амбасадата на Канада во Србија, Македонија и Црна Гора, а во насока на зајакнување на женското претприемништво и родовата еднаквост во Македонија