За луѓето, именувањето на животните доаѓа природно. Но, се чини дека е пронајден животински вид кој си дава имиња - неверојатно откритие во областа на зоологијата.

Според истражувачите, африканските савански слонови имаат имиња во форма на ниски звуци слични на татнеж.

Научниците што ги проучуваат слоновите во некои од резерватите за слонови во Кенија забележале дека животните изгледаат како да се повикуваат едни со други со поединечни имиња - односно уникатни звуци специфични за единките во нивните општествени групи.

За целите на истражувањето, истражувачите снимиле повици на слонови во две области на Кенија - 527 звуци од екосистемот Самбуру на север и 98 повици во Националниот парк Амбосели на југ. За да одреди кои вокализации се специфични за единка, тимот издвоил кои членови на групи женски слонови и нивните потомци се одвоиле од нивното стадо кога се произведувал звук. На крајот, научниците идентификувале татнежи специфични за 119 единки.

Додека татнежот на слонот може да звучи слично при првото слушање, истражувачите ја истренирале вештачката интелигенција за да ги открие суптилните разлики во секоја вокализација. Досега тие точно ги идентификувале примачите на 20,3 отсто од 625 снимени повици.

Интересно е што повиците не биле генерички звуци наменети за мајки или бебиња, туку биле различни за примачот. Научниците откриле и дека слоновите реагирале посилно на снимките од повиците што првично им биле упатени отколку на повиците упатени до други слонови.

Според овие извонредни наоди, слоновите се првите животни што си даваат имиња.

Извор: Mymodernmet.com
Фото: Freepik