Четири наносателити на германската компанија „Орора тек“, секој со големина на помало парче рачен багаж, во мај беа распоредени во ниската Земјина орбита за со помош на термални сензори и вештачка интелигенција да откриваат пожари уште во нивната почетна фаза.

Станува збор за пионерски систем кој би можел значително да го скрати времето на реакција на противпожарните служби, да ја намали материјалната штета и да спаси човечки животи. Истовремено, проектот претставува чекор кон поголема европска технолошка независност во областа на набљудувањето на Земјата.

ВИ ги анализира податоците во реално време

Сателитите се опремени со термални сензори кои можат да откријат нови пожари со големина од четири метри. Со тоа значително ги надминуваат можностите на конвенционалните сателити, кои по правило можат да регистрираат пожари со големина од неколку десетици метри.

- Го скенираме подрачјето, собраните снимки ги испраќаме до нашите модели на вештачка интелигенција, а тие ги анализираат со просторна резолуција од 4 × 4 метри. Врз основа на таа анализа системот може да утврди дали навистина се работи за пожар, по што информациите автоматски ги проследуваме до противпожарните служби и другите надлежни органи - објаснува извршниот директор на „Орора тек“, Јоанис Ландурис.

Кога системот ќе открие пожар, пожарникарите речиси моментално добиваат податоци за неговата локација, големина и интензитет. Тоа е особено важно во ситуации кога истовремено ќе избијат повеќе пожари бидејќи овозможува поефикасно распределување на луѓето и опремата.

Платформата притоа не служи само за дојава на пожари. Таа ги обединува сателитските податоци, овозможува симулации на ширење на огнот и им помага на пожарникарите во процената на можниот развој на ситуацијата на теренот.

- Ако сте на терен со таблет, можете да процените како одреден распоред на противпожарните екипи ќе влијае врз можноста за ширење на пожарот. Истовремено можете да активирате симулации и да го предвидите неговиот развој - истакнува Ландурис.

Грчкиот министер за дигитално управување Димитрис Папастергиу нагласува дека системот ќе биде особено вреден во текот на летните месеци, кога земјата редовно се соочува со големи шумски пожари.