Доктор Ендру Вил од „Харвард“ е автор на неколку бестселери и заговорник на вежбањето холистичко дишење во борбата против стресот. Техниката на дишење што тој ја пропагира наводно помага за намалувањето на анксиозноста, но и за заспивањето, елиминирањето на неконтролираниот глад и артикулирањето импулсивен бес.

Вил е планетарно популарен, основач е на Центарот за интегративна медицина на Универзитетот во Аризона, а го обожаваат и ѕвездите, на пр., Опра Винфри.

- Дишењето многу влијае врз процесот и психологијата на мислите, што го вклучува и расположението. Ако се сконцентрирате само на дишењето, а не правите ништо за да го промените, можете да го насочите кон опуштање.

Станува збор за едноставна техника на дишење што не одзема многу време, а се состои од само неколку чекори.


1. Ставете го врвот на јазикот на непцето точно над горните предни заби и држете го таму во текот на целата вежба.

2. Издишете докрај на уста со лесен звук.

3. Затворете ја устата и лесно вдишете низ нос и во себе избројте до четири.

4. Држете го здивот додека броите до седум.

5. Издишете докрај на уста и притоа избројте до осум. Повторете го звукот што претходно го испуштивте.

6. Повторете го овој циклус до четири пати.

За оние што хронично дишат послабо, броењето до четири во текот на вдишувањето им помага да земат повеќе воздух, а држењето на воздухот додека броите до седум му дава повеќе време на кислородот да продре во крвотокот, додека издишувањето до осум ја намалува работата на срцето и испушта поголемо количество јаглероден диоксид од белите дробови.

За да забележите придобивки, неопходно е техниката да ја применувате барем двапати дневно, советува д-р Вил. Тој предупредува и дека не би требало да се повтори процесот повеќе од четири пати додека вежбата не е целосно совладана. Со оглед на тоа што е можно на почетокот да ви се врти во главата, најдобро е да ја изведувате вежбата во седечка или лежечка положба. Ако не можете да ги издржите интервалите со оваа должина, преполовете ги така што ќе имате техника 2-3, 5-4. Почестото и подолгото практикување на оваа вежба ќе овозможи поголема ефикасност.

Важно е да се напомене дека не постојат клинички истражувања што ја поддржуваат оваа идеја, така што засега се потпира само на искуствата на оние што ја практикуваат.