Според Глобалниот индекс за услови на живот, Ванкувер, Калгари и Торонто се меѓу првите 10 најдобри градови за живот за 2023 година.

Иако европските и скандинавските земји често се на врвот на ранг-листите, Канада тивко се искачува по скалилата и станува сериозен кандидат. Овој пораст е особено видлив на најновото рангирање на најдобри градови за живеење во светот, објавено од истражувачката група „Економист интелиџенс јунит“ врз основа на Глобалниот индекс на услови за живот.

Меѓу првите 10, Канада има повеќе градови од која било друга земја - дури три. Трите најдобро пласирани градови во Канада се Ванкувер (5. место), Калгари (7. место кое го дели со Женева) и Торонто (9. место).

Сите три града добија одлични оцени за здравствена заштита и образование. Овие области се важни за Канаѓаните, кои имаат пофални зборови за владините политики кои го подобруваат квалитетот на животот.

- Нашите прогресивни политики и сеопфатна здравствена заштита ја прават Канада одлично место за живеење. Не можам да замислам да живеам во земја во која треба да се грижам дали ќе банкротирам ако одам на лекар - вели Саманта Фалк, жителка на Ванкувер.

Оваа грижа за населението е над политиката и создава чувство на заедница што ги подобрува условите за живот и на работа и дома.

- Канаѓаните се познати по тоа што се пријателски расположени и подготвени да помогнат, без разлика дали се работи за училишта, постари лица или сопственици на бизниси - вели Џејн Столер, жител на Ванкувер.

Благодарение на инвестициите во јавниот превоз и сообраќајната мрежа, луѓето лесно можат да се движат низ канадските градови.

Фалк, која живеела во Монтреал, Калгари и Торонто, положила за возачка дозвола на 24 години, а нејзината пријателка ќе ја добие дозволата на 53 години бидејќи едноставно не ѝ бил потребен автомобил.

Сепак, она што жителите најмногу го сакаат е силната поврзаност на Канаѓаните со природата.

Сите три од десетте најдобри градови за живеење во светот, како и многу други градови во Канада, се наоѓаат блиску до природата, а имаат и многу зелени површини. Но, и надвор од големите градови, луѓето се насочени кон природата.


Ванкувер

Лоциран во живописниот западен брег на земјата, Ванкувер е прогласен за најдобар град за живеење во Канада благодарение на извонредните оцени за културниот живот и животната средина. Во овие категории само Окленд, Нов Зеланд, е пред Ванкувер.

Токму овие вредности се нагласени од жителите кои се воодушевени од природните убавини на градот.

- Уникатната и величествена комбинација на планини и океан го прави Ванкувер неодолив. Дури и по 20 години живеење овде, Ванкувер сè уште ми го одзема здивот - вели Фалк.

Калгари

Сместен во близина на Карпестите Планини, во западната канадска провинција Алберта, Калгари се најде на врвот според својот совршен индекс на стабилност (кој ги мери граѓанските немири и корупцијата во владиниот сектор).

Жителите велат дека во Калгари се чувствуваат како да живеат во мала заедница која нуди голем број содржини, а истовремено трошоците се пониски отколку во другите градови во Канада.

- И покрај тоа што е еден од најголемите градови во Канада, Калгари успева да го задржи својот уникатен шарм благодарение на пријателски настрените жители, посветеноста на пазарите каде што земјоделците ги продаваат своите производи - вели Лора Поуп, жителка на Калгари и блогерка која патува.


Торонто

Како најнаселен град во Канада, Торонто ја комбинира атмосферата на голем град со повеќе од 1.500 паркови каде што жителите можат да уживаат во природата.

Торонто доби највисока оцена за стабилност. Поради чувството на сигурност и безбедност, луѓето лежерно пешачат, возат велосипеди и користат јавен превоз. Благодарение на инфраструктурата погодна за луѓето, животот е многу полесен отколку во слични урбани средини.

Исто така, градот е познат по својата мултикултуралност. Повеќе од 51 отсто од населението е родено надвор од Канада.

- Ова е единствениот голем град на Запад каде што видливото малцинство е мнозинство. Тука имате можност да запознаете многу култури и да слушнете различни јазици. Канада го прифаќа мултикултурализмот и бара од луѓето да се вклопат - вели Маркус Редер, извршен директор и коосновач на софтверската компанија „Хоставеј“.

Ваквата културна разновидност ја збогатува заедницата со разни фестивали, национални кујни достапни по различни цени и почитување на новите идеи и начини на живот.

Извор: BBC
Фото: Freepik