Од 1 јуни 2024 година барателите на работа што не се од земји членки на ЕУ можат да дојдат во Германија користејќи ја таканаречената картичка за шанси. Не им е потребен договор за вработување на неопределено време, туку имаат време од една година да бараат работа. Предуслов за добивање на картата за шанси е најмалку две години стручна обука или универзитетска диплома, како и основни познавања на германскиот јазик на ниво А1 или англиски јазик на ниво Б2. Личната врска со Германија исто така игра улога.

Поените се доделуваат во зависност од професионалното искуство, јазичните вештини, возраста и поврзаноста со Германија. Секој што е квалификуван за работа во која има голем недостиг на работна сила добива дополнителни поени. Под одредени околности, периодот за барање работа може да се продолжи најмногу за две години.

Барателите на работа треба сами да си ги платат животните трошоци. Само оние што се успешни во барањето работа можат да останат подолго. Но, предуслов е бруто-платата годишно да биде најмалку 40.770 евра или да се исплаќа во согласност со тарифата. Паралелно со барањето работа е дозволено секундарно вработување до 20 часа.

Картичката за шанси е трет дел од Законот за доселување квалификувани работници. Законот беше донесен во 2020 година од тогашната коалиција на социјалдемократите и конзервативната ЦДУ со цел да привлече работници од земји што не се членки на ЕУ.

За работниците од земјите од Западен Балкан, од 1 јуни има повеќе можности на германскиот пазар на труд, дури и ако тие немаат обука. Сепак, тие мора да покажат договор за вработување пред да влезат во земјата.