Дури и ако содржината на вашите соништа не е топла или жешка, влегувањето во фаза на брзо движење на очите (РЕМ) може да ве загрее однатре.

Во природата, топлокрвните суштества со пониски температури на телото имаат тенденција да имаат подолги периоди на РЕМ-сон. Оние со повисока телесна температура, како што се птиците, доживуваат помалку РЕМ-фази на спиење.

Неврологот и водечки научник за спиење Џером Сигел од Универзитетот во Калифорнија, Лос Анџелес, вели дека врската е вредна за внимание и треба дополнително да се истражува.

Тој тврди дека РЕМ-спиењето може да биде нешто како „треперење на мозокот“ кога температурата на мозокот и телото паѓаат премногу ниско за време на фазата што не припаѓа на РЕМ-спиењето.

За време на РЕМ-фазата, мозокот останува доста активен, што ја зголемува температурата на органите. Покрај тоа, по РЕМ-спиењето речиси секогаш следува фазата што не припаѓа на РЕМ, кога телото и мозокот се најмалку активни и ладни.

- РЕМ-спиењето може да се смета како термостатски контролиран механизам за загревање на мозокот, поттикнат од намалување на температурата поврзано со намален метаболизам и намалување на потрошувачката енергија во фазата што не е поврзана со РЕМ - вели Сигел.

Всушност, можеби тоа е причината зошто некои животни покажуваат флуктуации во времетраењето на спиењето од сезона до сезона. Најекстремен пример за тоа е хибернацијата, но дури и животните што не хибернираат, како арктичките ирваси, спијат 43 отсто повеќе во зима отколку во лето.

Дали РЕМ-спиењето може да помогне во заштитата на мозокот на животните од студот и притоа да им овозможи важно време за одмор?

Сигел смета дека тоа е сосема можно, особено затоа што другите хипотези околу РЕМ-спиењето се покажале како несовршени.

Некои научници посочуваат дека фазата што не е поврзана со РЕМ-спиењето помага да се исчистат токсините од мозокот, додека РЕМ-спиењето помага да се подобрат меморијата и учењето, со намалување на нервните врски за мозокот да биде поефикасен.

Спиењето за заштеда на енергијата на телото е од клучно значење, но животните треба да се осигурат дека можат да бидат разбудени од заканата. Ако Сигел е во право, РЕМ-сонот може да биде новото жешко решение за вековната загатка.

Извор: Science Alert
Фото: Freepik