Плановите на Кина да стане светски лидер во вештачката интелигенција и квантното пресметување се добро познати. Но, кинеската индустрија сега има нова цел - да создаде реални роботи кои можат да имитираат човечки постапки и емоции. И додека првата фабрика за хуманоидни роботи „Робо фаб“ (RoboFab) треба да почне со работа во САД на крајот од годината, кинеското Министерство за индустрија и информатичка технологија штотуку го претстави својот план за производство на првите кинески хуманоидни роботи до 2025 година.

Предвидени се пет суштински задачи насочени кон индустриски развој, вклучувајќи постигнување клучни технолошки откритија, негување вистински производи, проширување на сценаријата за примена, создавање индустриска екологија и зајакнување на капацитетот за поддршка.

Нови способности

Кинезите се најголемите светски производители на електроника и се надеваат дека ќе постигнат значителен напредок во следните две години во развојот на еколошки сензори, контрола на движење и системи за интеракција помеѓу човекот и машините. Во исто време, Министерството ги повика локалните компании и институции што повеќе да користат вештачка интелигенција во роботиката и да започнат што е можно повеќе истражувања за агилни роботски екстремитети.


Планот е навистина амбициозен и во него се наведува дека до 2027 година кинеските хуманоидни роботи треба да усвојат способности за учење и размислување. Се очекува хуманоидните роботи да преземат повеќе задачи од луѓето, од купување до работа во опасни ситуации. До 2025 година Кина планира да создаде почетна рамка за иновации за хуманоидните роботи, да постигне значителен напредок во правењето клучни компоненти како што се „мозоците, малиот мозок и екстремитетите“ и да им овозможи на своите компании безбедно и ефикасно снабдување со основни елементи.

Интеграција на роботи

Кинезите планираат до 2027 година способноста за технолошки иновации на хуманоидните роботи да се подобри толку многу што ќе создадат безбеден и сигурен индустриски синџир на снабдување. Дотогаш хуманоидните роботи ќе бидат толку интегрирани со сродни производи што ќе станат клучен нов мотор на економски раст. За да можат да ги исполнат плановите, ќе треба да работат на врвни чипови и основни алгоритми.

Во секој случај, потенцијалот на хуманоидните роботи е навистина огромен, а со поддршка на кинеската национална економија и политичките иницијативи, овие роботи треба да играат значајна улога во различни сектори, вклучително и во здравствената заштита и семејните услуги.


Според извештајот на новинската агенција „Ксинхуа“, кинеската пазарна вредност на хуманоидните роботи се очекува да достигне 870 милијарди јуани до 2030 година, или повеќе од 100 милијарди евра.

Извор: Bug
Насловна фотографија: Pixabay