Лицето на светот е изобличено од пандемијата. Владите во соработка со Светската здравствена организација (СЗО) мобилизираа максимални расположливи средства за решавање на ужасите и компликациите што настанаа поради ковид-19.

Кога голем број луѓе почнаа да умираат поради ковид-19, владините аранжмани и финансирањето не успеаја во некои земји.

Кој треба да ја преземе одговорноста поради смртните случаи од ковид-19? Дали едно семејство треба да добие надомест од Владата по смртта на член поради ковид-19, и ако одговорот е да, тогаш колкав треба да биде износот на надоместокот?

Економското влијание на смртните случаи поради ковид-19 беше огромно во одредени индиски домаќинства со оглед на тоа што 94 отсто од работното население во Индија се самовработени.

Што се случи во Индија?

Со огромното население од 1,3 милијарда и несоодветен систем за здравствена заштита, Индија беше релативно успешна во спречување на смртните случаи за време на првиот бран, влегувајќи во целосно заклучување неколку месеци во текот на првиот бран.

Вториот бран, сепак, ја фати владата неподготвена да се справи со претстојната катастрофа и покрај пакетите за помош што ги делегира во различни сектори на здравствена заштита и економија.


Зошто индиската Влада треба да плати надомест?

Во мај 2021 година беа поднесени две одделни молби до Врховниот суд на Индија со барање да ги упати Владата и другите поврзани агенции да плаќаат компензација (компензација што произлегува од добрина или благодат) во случаи на смртни случаи од ковид-19 во согласност со законот за справување со катастрофи од 2005 година.

Во 2015 година владиното известување го утврди износот за надомест на 400.000 рупии за семејството на секое лице што починало од национална катастрофа. Но, законот предвидува дека износот на надоместокот може да се ревидира од страна на Владата, тогаш кога ќе биде потребно.

Со оглед на тоа што централната Влада ја прогласи пандемијата на ковид-19 за национална катастрофа според законот за справување со катастрофи, смртните случаи од ковид-19 станаа легално покриени со законот.


Имајќи го предвид фактот дека индиската Влада веќе потроши огромни суми за управување со пандемијата и исто така фактот дека бројот на смртни случаи од ковид-19 ќе продолжи да расте бидејќи пандемијата сѐ уште не е завршена, највисокиот суд го одобри владиниот предлог за исплата на надомест од 50.000 рупии (674 американски долари) за секоја смрт од ковид-19 во рок од 30 дена од поднесувањето на апликацијата.

Останува да видиме колку ефикасно и беспрекорно ќе им се исплаќа овој надомест на погодените семејства во Индија.